शेवगाव दरोडय़ातील टोळी जेरबंद; नगर गुन्हे शाखेची कारवाई

शेवगाव दरोडय़ातील 5 आरोपींना 48 तासांत जेरबंद करण्यात नगरच्या स्थानिक गुन्हे शाखेच्या पथकाला यश आले आहे. या टोळीकडून 1 लाख 85 हजारांचा मुद्देमाल जप्त करण्यात आला आहे. पोलीस निरीक्षक दिनेश आहेर यांच्या पथकाने ही कारवाई केली.

अनिल उर्फ यासिनखाँ शिवाजी भोसले, रोहन अनिल उर्फ यासिनखाँ भोसले, अमर दत्तू पवार, कृष्णा उर्फ सागर नारायण भोसले, सुनील बाबाखाँ भोसले अशी अटक करण्यात आलेल्या दरोडेखोरांची नावे आहेत, तर या टोळीतील फरार साथीदार दीपक इंदर भोसले याचा पोलिसांकडून शोध सुरू आहे.

या टोळीतील अनिल उर्फ यासिनखाँ शिवाजी भोसले याने त्याच्या साथीदारांसह शेवगाव येथे दरोडा घातल्याची माहिती पोलीस निरीक्षक दिनेश आहेर यांना सोमवारी समजली होती. तसेच नेवासा फाटा परिसरात सदर आरोपी असल्याचे सांगण्यात आले होते. त्यानंतर पोलिसांनी सापळा लावत आरोपींना अटक केली. दरम्यान, अनिल उर्फ यासिनखाँ शिवाजी भोसले याच्यावर नगर जिह्यात दरोडा, जबरी चोरी, घरफोडीसह गंभीर गुन्हे दाखल आहेत.

दीपक बाबासाहेब जरांगे (रा. मारवाडी गल्ली, शेवगाव) यांच्या घरात 8 जून रोजी चोरटय़ांनी दरोडा टाकला होता. जरांगे यांच्या घरातील नागरिकांना चाकूचा धाक दाखवत आणि मारहाण करीत सुमारे 1 लाख 85 हजारांचा मुद्देमाल लुटला होता. यासंदर्भात शेवगाव ठाण्यात गुन्हा दाखल झाला होता. या गुह्याचा तपास नगरच्या स्थानिक गुन्हे शाखेच्या पथकाने करत आरोपींना जेरबंद केले. दरम्यान, महिन्यापूर्वी चांदगाव उस्थळदुमाला, ता. नेवासा परिसरात चोरी केल्याची कबुली आरोपींनी दिली आहे.

पोलीस अधीक्षक राकेश ओला, पोलीस निरीक्षक दिनेश आहेर यांच्या मार्गदर्शनाखाली पोलीस उपनिरीक्षक समाधान भाटेवाल, दत्तात्रय गव्हाणे, बापूसाहेब फोलाणे, संतोष लोढे, अतुल लोटके, देवेंद्र शेलार, विजय ठोंबरे, संदीप दरंदले, फुरकान शेख, किशोर शिरसाठ, मेघराज कोल्हे व संभाजी कोतकर आदींच्या पथकाने ही कारवाई केली.