राज्यात महाविकास आघाडीचेच सरकार येऊदे, निलेश लंके यांनी मोहटा देवीला घातले साकडे

लोकसभा निवडणुकीत नगर लोकसभा मतदार संघातून राष्ट्रवादी काँग्रेस शरदचंद्र पवार पक्षाचे उमेदावर निलेश लंके विजयी झाले. खासदार म्हणून निवडून आल्या नंतर निलेश लंके यांनी प्रथमच मोहटा देवीच्या गडावर जाऊन देवीचे दर्शन घेतले.

खासदार म्हणून निवडणून आल्यानंतर निलेश लंके यांनी प्रथमच कार्यकर्त्यांसमवेत मोहटा देवी गडावर जाऊन देवीचे दर्शन घेतले. यावेळी निलेश लंके यांनी इंडिया आघाडीचे सरकार केंद्रात येऊदे असे साकड मोहटा देवीला घातले. देवीचे दर्शन घेतल्यानंतर लंके यांनी स्थानिकांशी संवाद साधला. “माझी मोहटा देवीवर मोठी श्रद्धा आहे. म्हणूनच मी प्रत्येक निवडणुकीत उमेदवारी अर्ज दाखल करण्यापूर्वी व मतमोजणीच्या आदल्या दिवशी देवीचा आशीर्वाद घेण्यासाठी येत असतो. या लोकसभा निवडणुकीत मतमोजणीच्या आधीच्या मध्यरात्री देवीच्या दर्शनासाठी आलो होते. या ठिकाणी आल्यानंतर मला मनशांती मिळते. आज मी केंद्रात इंडिया आघाडीचे शासन येऊ दे, माझ्या मतदारसंघातील व देशातील वातावरण आनंदात राहूदे, जातिभेदाला मुठमाती मिळू दे असे साकडे देवीला घातले आहे. तसेच या वेळी विधानसभा निवडणुकीत शरद पवार, उद्धव ठाकरे व काँग्रेसची सत्ता राज्यात पुन्हा येणार ही काळ्या दगडावरीच पांढरी रेघ आहे. राज्यात आमचेच सरकार येणार, ” असे साकडे देवीला घातल्याचे यावेळी लंके म्हणाले.

देवीचे दर्शन घेऊन झाल्यानंतर अर्जुन धायतडक मित्रमंडळाच्या वतीने लंके यांची पेढेतुला करण्यात आली. तसेच देवस्थानच्या वतीने देवस्थानचे मुख्यकार्यकारी अधिकारी सुरेश भणगे यांनी लंके यांचा सत्कार केला. यावेळी लंके यांच्या सोबत प्रताप ढाकणे, राफिक शेख, शिवशंकर राजळे, बंडुपाटील बोरुडे, अर्जुन धायतडक, राजेंद्र दौण्ड, गहिनीनाथ शिरसाठ, राजेंद्र ढाकणे, उद्धव दुसंग, इलियास शेख आणि बालासाहेब लवांडे हे उपस्थित होते.