“..तर तिची ठेचून हत्या झाली असती”; रवीना टंडनच्या व्हिडीओवर कंगनाची प्रतिक्रिया

अभिनेत्री रवीना टंडनच्या व्हायरल व्हिडीओप्रकरणी आता अभिनेत्री आणि भाजपची उमेदवार कंगना राणौतने प्रतिक्रिया दिली आहे. ही घटना अत्यंत चिंताजनक असल्याचं तिने म्हटलंय. रवीनावर एका वृद्ध महिलेला मारहाण आणि शिवीगाळ केल्याचा आरोप आहे. वांद्रे इथं रवीनाचा भररस्त्यात वाद झाल्याचा हा व्हिडीओ सोशल मीडियावर व्हायरल होत आहे. कार उभी करण्यावरून झालेल्या वादातून रवीना आणि तिच्या चालकाने मारहाण केल्याचा आरोप तिघांनी केला. शनिवारी रात्री वांद्रे इथल्या कार्टर रोडवर ही घटना घडली. स्थानिकांनी रवीनाच्या कारला घेराव घातल्यानंतर तिने बाहेर येऊन जमावाशी बोलण्याचा प्रयत्न केला. “कृपया मला मारू नका, माझ्या ड्राइव्हरला मारू नका”, अशी ती विनंती करताना व्हिडीओत दिसून येत आहे.

कंगनाची पोस्ट-

या घटनेचा व्हिडीओ पाहिल्यानंतर कंगनाने तिच्या इन्स्टा स्टोरीमध्ये पोस्ट लिहित संताप व्यक्त केला. ‘रवीना टंडनजींसोबत जे घडलं, ते खूपच चिंताजनक आहे. विरुद्ध गटात आणखी पाच-सहा लोक असते तर तिची ठेचून हत्या झाली असती. अशा रोड रेजच्या उद्रेकाचा आम्ही निषेध करतो. अशा लोकांना फटकारलं पाहिजे. त्यांनी अशा पद्धतीने हिंसक आणि विषारी वागू नये’, असं कंगनाने लिहिलं.

नेमकं काय घडलं?

कार्टर रोड परिसरात रवीनाचा ड्राइव्हर कारची पार्किंग करताना मागे एक वृद्ध महिला उभी होती. कार फिरवताना वृद्ध महिलेला धडक लागल्याचा आरोप तिच्यासोबत असलेल्या व्यक्तीने केला. यानंतर तिथे काही स्थानिक लोक जमले आणि त्यांनी रवीनाच्या ड्राइव्हरला कारबाहेर काढून मारण्यास सुरुवात केली. तेव्हा रवीना मध्यस्थी करण्यासाठी आली आणि तिने लोकांना विनंती केली. “कृपया माझ्या ड्राइव्हरला मारू नका, हात उचलू नका”, अशी विनंती रवीनाने केली. रवीनाच्या मते तिच्या कारची धडक वृद्ध महिलेला लागलीच नव्हती. तरीही स्थानिकांनी वाद वाढवला. तर दुसरीकडे संबंधित वृद्ध महिलेसोबत असलेल्या व्यक्तीने रवीनासह तिच्या चालकावर मारहाण आणि शिवीगाळचा आरोप केला.

Allegations of Assault by #RaveenaTandon & her driver on elderly Woman Incident near Rizvi law college, family Claims that @TandonRaveena was under influence of Alcohol, women have got head injuries, Family is at Khar Police station @MumbaiPolice @CPMumbaiPolice @mieknathshinde pic.twitter.com/eZ0YQxvW3g

— Mohsin shaikh (@mohsinofficail) June 1, 2024

पोलीस काय म्हणाले?

खार पोलिसांनी दिलेल्या माहितीनुसार, सीसीटीव्हीत असं दिसून आलं की संबंधित वृद्ध महिला ही रवीनाच्या कारजवळच उभी होती, मात्र त्यांना कारची धडक लागली नव्हती. या घटनेनंतर तिथल्या स्थानिकांनी रवीनासह चालकाने तिघांना शिवीगाळ करून मारहाण केल्याचा आरोप केला. याप्रकरणी कोणताच एफआयआर दाखल झाला नाही.