वेगळ्या धाटणीचे सिनेमे घेऊन अभिनेत्री पर्ण पेठे प्रेक्षकांच्या भेटीला येत असते. तिच्या अभिनयाचे अनेकजण फॅन आहेत. आता पर्ण पेठे एका नव्या माध्यमातून प्रेक्षकांच्या भेटीला येत आहे. ‘विषय हार्ड’ हा पर्ण पेठेचा सिनेमा लवकरच प्रेक्षकांच्या भेटीला येणार आहे. महाराष्ट्राच्या अस्सल लाल मातीतील रांगड्या भाषेचा साज लेवून सजलेल्या ‘विषय हार्ड’ या चित्रपटातील ‘येडं हे मन माझं…’ हे प्रेमगीत नुकतंच सिनेरसिकांच्या भेटीला आलं आहे. या गाण्याची सध्या चर्चा होतेय. प्रेमाची अनोखी कथा सांगणारा ‘विषय हार्ड’ हा मराठी चित्रपट येत्या 5 जुलै रोजी प्रेक्षकांच्या भेटीला येणार आहे.
कोणता सिनेमा?
‘विषय हार्ड’ सिनेमाच्या निमित्ताने एकीकडे पर्णचा आजवर कधीही न पाहिलेला अंदाज या गाण्यात पाहायला मिळतो आहे. तर सुमित पाटीलच्या अभिनयानेही लक्ष वेधून घेते. हे गाणं म्हणजे या चित्रपटातील नायक-नायिकेच्या बालपणापासून तरुणपणापर्यंतच्या आठवणींचा जणू एक अल्बमच आहे. ‘येडं हे मन माझं, न्हालं प्रेमामध्ये, बावरलं, सावरलं गं रंगलंय…’ हे शब्द प्रेमाचा खराखुरा अर्थ सांगून जातात. या गाण्याचे छायाचित्रण अभिषेक शेटे आणि जय पारीख यांनी केलं आहे.
बर्डबॅाय एन्टरटेन्मेंट आणि कोल्हापूर टॅाकिज या बॅनरखाली ‘विषय हार्ड’ची निर्मिती गीतांजली सर्जेराव पाटील, सर्जेराव बाबूराव पाटील आणि सुमित पाटील यांनी केली आहे. सुमित यांनी या चित्रपटाचं दिग्दर्शन केलं आहे. त्यांनीच कथालेखनाची जबाबदारीही सांभाळली आहे. सोशल मीडियावर या प्रेमगीताला अफलातून पसंती मिळत असून या गाण्यानं संगीतप्रेमींना ‘येड’ लावल्याचं चित्र पाहायला मिळत आहे.
कोण-कोण कलाकार सिनेमात असणार?
पर्ण आणि सुमित पाटील ‘विषय हार्ड’ सिनेमाच्या निमित्ताने प्रथमच एकत्र आले आहेत. या दोघांसोबत हसन शेख, नितीन कुलकर्णी, विपीन बोराटे, प्रताप सोनाळे, भूमी पाटील, चैत्राली इनामदार, आनंद बल्लाळ आदी कलाकार आहेत.या चित्रपटातील गीतांचे लेखन नंदकुमार गोरुले, सुदर्शन खोत, साहिल कुलकर्णी, सुमित, रिषभ पाटील, विशाल सदाफुले यांनी केले आहे. साहिल कुलकर्णी यांनी या गीतांना संगीत दिलं आहे.
अभिषेक शेटे आणि जय पारीख यांनी सिनेमॅटोग्राफी केली आहे. स्वप्नील बांदेकर आणि विनायक सुतार यांनी कला दिग्दर्शन केलं आहे. नृत्य दिग्दर्शनाची जबाबदारी ओंकार शेटे यांनी सांभाळली असून, सायली घोरपडे यांनी वेशभूषा केली आहे. सौरभ प्रभुदेसाई यांनी संकलन केलं असून, संदीप गावडे या चित्रपटाचे कार्यकारी निर्माते आहेत.
सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.
.jpeg)
Comment List