Delhi Excise Policy : मनीष सिसोदिया यांना दिलासा नाहीच, न्यायालयीन कोठडीत पुन्हा वाढ

दिल्लीतील कथित मद्य घोटाळा प्रकरणात आम आदमी पक्षाचे (आप) नेते मनीष सिसोदिया यांना कोर्टाकडून दिलासा मिळालेला नाही. राउज एव्हेन्यू कोर्टाने गुरुवारी (30 मे) मनीष सिसोदिया आणि इतर आरोपींच्या न्यायालयीन कोठडीत 6 जुलैपर्यंत वाढ केली आहे. मनीष सिसोदिया यांना गेल्या वर्षी कथित मद्य धोरण घोटाळा प्रकरणात अटक करण्यात आली होती. यानंतर फेब्रुवारीमध्ये सिसोदिया यांना लखनऊमध्ये भाचीच्या लग्नात सहभागी होण्यासाठी तीन दिवसांसाठी जामीन मंजूर करण्यात आला होता.

मनीष सिसोदिया हे मद्य धोरण घोटाळा प्रकरणातील आरोपी आहेत. या प्रकरणाची केंद्रीय यंत्रणांमार्फत चौकशी सुरू आहे. सीबीआयने सिसोदिया यांना 2 फेब्रुवारी रोजी अटक केली होती. याप्रकरणात झालेल्या मनी लाँड्रिंगचा तपास ईडीकडून केला जात आहे. सिसोदीया 2 फेब्रुवारीपासून तुरुंगात आहेत. गेल्या दीड वर्षांपासून ते तुरुंगात असून त्यांनी गेल्या महिन्यात तुरुंगातूनच आपल्या पटपरगंज या मतदारसंघातील जनतेला पत्र लिहिले होते. यात त्यांनी ‘लवकरच बाहेर भेटूया’, असे म्हटले होते.

मद्य धोरण घोटाळाप्रकरणी सर्वोच्च न्यायालयात झालेल्या सुनावणीदरम्यान ईडीने आम आदमी पार्टीला या प्रकरणात 17 मे रोजी आरोपी बनवले होते. दिल्लीचे मुख्यमंत्री आणि आपचे संयोजक अरविंद केजरीवाल यांनी ईडीने केलेल्या अटकेला सर्वोच्च न्यायालयात आव्हान दिले आहे. तसेच ईडीने केलेले सर्व आरोप फेटाळून लावले आहेत. तसेच भाजप राजकीय सूडबुद्धीने आम आदमी पक्षाविरोधात कारवाई करत असल्याचा आरोप ‘आप’ने केला आहे.

तुरुंगात मनिष सिसोदिया, सत्येंद्र जैन यांना भाजपची ऑफर; CM केजरीवाल यांचं मोठं विधान