100 दिवसांचे मानधन केवळ 150 रुपये! बीएलओंची निवडणूक आयोगाकडून थट्टा

रणरणत्या उन्हाची पर्वा न करता लोकसभा निवडणुकीसाठी मतदारांची यादी तयार करण्यापासून ते मतदान कार्ड घरोघरी पोहोचवण्यापर्यंतची सर्व कामे बीएलओ डय़ुटी बजावणाऱया शिक्षकांनी उत्साहाने केली. असे असतानाही बीएलओंना शंभर दिवसांच्या कामासाठी निवडणूक आयोगाने अवघे 150 रुपये मानधन देऊन त्यांची थट्टा केल्याचा संतापजनक प्रकार समोर आला आहे.

शिक्षकांकडे शाळेतील कामाचा बोजा असतानादेखील त्यांना निवडणुकीच्या कामांसाठी जुंपले जाते. यंदाही लोकसभा निवडणुकीच्या पार्श्वभूमीवर शिक्षकांना फेब्रुवारीपासून निवडणुकांची कामे लावण्यात आली. शिक्षकांनी तीन महिने बीएलओ डय़ुटी प्रामाणिकपणे बजावूनही आयोगाने तुटपुंज्या मानधनावर त्यांची बोळवण केली. याबाबत चेंबूरमध्ये बीएलओ डय़ुटी बजावणाऱया शिक्षिका म्हणाल्या, रणरणत्या उन्हाची पर्वा न करता घरोघरी जाऊन मृत, दिव्यांग आणि स्थलांतरित व्यक्ती शोधून त्याचे अहवाल देणे, नवीन मतदार नोंदणी करणे, वयोवृद्धांसाठी गृह मतदान प्रक्रिया राबविणे अशी निवडणूक आयोगाचे अधिकारी सांगतील ती कामे केली. मार्चनंतर शिक्षकांना फक्त मंगळवार आणि शनिवार बोलवायचे असा निर्णय झाला तरी आम्हाला दररोज बोलावले जायचे.  केवळ एक दिवस काम करणाऱया निवडणूक अधिकाऱयांना 1300 ते 2000 इतके मानधन दिले जाते, मग बीएलओंना तीन महिन्यांसाठी 150 रुपये कसे काय? केलेल्या कामाचे आणि मानधनाचे गुणोत्तर कशाच्या आधारावर ठरवले, असा सवाल या शिक्षिकेने उपस्थित केला.

सोयीसुविधांची वानवा

निवडणुकीच्या दिवशी दिवसभर आम्ही सर्व बीएलओ मतदान पेंद्राबाहेर उन्हात बसलो होतो. तिथे साधा पंखासुद्धा नव्हता. निवडणूक झाल्यावर शिल्लक राहिलेल्या स्लीप आणि अहवाल घेऊन पुन्हा मुख्य निवडणूक कार्यालय इथे बोलावले. एकदाही आम्हाला वाहन सुविधा दिली नाही, असेही या शिक्षिकेने सांगितले.