होय, मोदींना देवानेच पाठवलंय, अदानी-अंबानींना मदत करायला!

मोदींच्या देवाने मोदींना सांगितले, अदानींची मदत करा. अंबानींची मदत करा. हिंदुस्थानातील सगळे एअरपोर्ट अदानींना द्या. पॉवर प्लांट, रेल्वे अदानींकडे सोपवा. अदानी-अंबानींचे 16 लाख कोटींचे कर्ज माफ करा. हा कसा देव आहे. हा मोदीवाला देव आहे.

माझा जन्म बायोलॉजिकल नाही, मला देवाने पाठवले आहे’, असे विधान करणाऱ्या पंतप्रधान नरेंद्र मोदी यांना काँग्रेस नेते राहुल गांधी यांनी आज पुन्हा एकदा लक्ष्य केले. ‘होय, मोदींना देवानेच पाठवलंय पण गरिबांच्या कल्याणासाठी नाही तर अदानी आणि अंबानींना मदत करण्यासाठी पाठवले आहे,’ असा सणसणीत टोला राहुल यांनी लगावला.

उत्तर प्रदेशातील देवरिया येथे प्रचारसभेत बोलताना राहुल गांधी यांनी मोदींच्या दाव्यांची खिल्ली उडवली. ‘मोदी म्हणतात, अरे चमच्यांनो, हा मोदी काहीच करत नाही. सगळं आपोआप होतं. मला भूतलावर देवाने पाठवले आहे. बाकी सगळे बायोलॉजिकल आहेत. आईवडिलांपासून जन्माला आलेत पण मी वरून टपकलो आहे. देवाने त्याचे काम करायला मला हिंदुस्थानात पाठवले आहे.’ मोदींचे हे म्हणणे खरे असेल तर त्यांना देवाने अदानी आणि अंबानींचे काम करायला पाठवले आहे का? हे सगळं अजबच आहे, अशा शब्दांत राहुल यांनी मोदींचा समाचार घेतला.
गरीब आणि शेतकऱ्यांना मदत करायला हवी!

मोदींना खरेच देवाने पाठवले असते तर देव त्यांना म्हणाला असता, हिंदुस्थानातील दुर्बलाची मदत करा. शेतकरी, मजूर, गरिबांना मदतीचा हात द्या, पण तसे झाले नाही, असे नमूद करत मोदींच्या अदानी-अंबानी प्रेमावर राहुल यांनी प्रहार केला.
– ‘4 जूननंतर गुड बाय भाजपा… गुड बाय नरेंद्र मोदी! जनतेला लुटणाऱया नकली फकिराकडे आता फक्त सात दिवस उरलेत. इंडियाला मते मिळत आहेत खटाखट, भाजपपासून देशाला मुक्ती मिळणार आणि अच्छे दिन येणार फटाफट’ अशी फटकेबाजीही राहुल गांधी यांनी केली.

वाचा, मोदी काय म्हणतात…
‘माझ्या नशिबात शिव्या-शाप आणि अपमान लिहिलेलाच आहे. हे राजकारणात आल्यावर म्हणतोय असे नाही. मी लहानपणापासूनच असे आयुष्य जगत आलो आहे. सामान्य आयुष्यातही मी अनेक अपमान सहन केले. मी कप-बशा धुवायचो. छोटंसं दुकान होतं. चहा थंड झाला तर मला ओरडा पडायचा, रागाने मालक माझ्या कानाखाली मारायचा. हे सगळं मी सहन केलं आहे, असे विधान आता पंतप्रधान नरेंद्र मोदी यांनी एका वृत्तवाहिनीला दिलेल्या मुलाखतीत केले आहे.

मोदी देवांचेही राजा
नरेंद्र मोदी हे सुरेंद्र मोदी आहेत, केवळ नरांचे नाही तर ते सूरांचेही नेते आहेत, असे आता सगळेच बोलत आहेत. देवही शुभ विचार करतो आहे. देवाची भाषा तुम्ही समजून घ्या. मोदी लोकांचेच नाही, देवांचेही राजे आहेत, असे विधान आता भाजपचे राष्ट्रीय अध्यक्ष जे. पी. नड्डा यांनी केले आहे. या विधानावरून ते सोशल मीडियात चांगलेच ट्रोल होत आहे.