देशाला त्रास देणे थांबवा, तुमचे मंदिर बांधू; ममता बॅनर्जी यांचा मोदींना टोला

देवाने आपल्याला विशेष उद्देशाने पाठवले आहे, असे वक्तव्य पंतप्रधान नरेंद्र मोदी यांनी नुकतेच केले होते. त्यांच्या या विधानावरून त्यांच्यावर टीकाही करण्यात आली. पराभवाच्या भीतीने मोदींचा भ्रमनिरास झाल्याने ते अशी वक्तव्ये करत आहेत, असा हल्लाबोल काँग्रेसचे नेते जयराम रमेश यांनी केला होता. आता त्यांच्या या विधानावरून पश्चिम बंगालच्या मुख्यमंत्री ममता बॅनर्जी यांनीही मोदींना जबरदस्त टोला लगावला आहे. जर पंतप्रधान मोदी खरोखरच देवाने पाठवल्याचा दावा करत असतील तर लोक त्यांच्यासाठी मंदिर बांधतील. पण मोदींना देशाला त्रास देणे थांबवावे, असा टोला ममता बॅनर्जी यांनी मोदींना लगावला आहे.

मोदी म्हणतात की त्यांचे जैविक पालक नाहीत. देवाने त्यांना पृथ्वीवर विशेष उद्देशाने पाठवले आहे. आपल्या आईचे निधन झाल्यानंतर ही गोष्ट प्रकर्षाने जाणवत असल्याने ते म्हणाले. तसेच 2047 पर्यंत ते देवाने पाठवलेला दूत म्हणून राहतील, असेही ते म्हणाले होते. यावर ममता बॅनर्जी म्हणाल्या की, जर मोदी खरोखर देव असतील तर ते चांगलं आहे. पण देव राजकारण करत नाहीत. ते लोकांबद्दल वाईट बोलत नाही किंवा दंगलीत त्यांना मारत नाही. खोटंही बोलत नाही, असेही त्या म्हणाल्या.

मी तुम्हाला एक जागा देईन जेणेकरून तुम्ही मंदिर बांधू शकाल आणि तुमचा फोटो ठेवू शकाल. आम्ही तुळशीची पाने देखील अर्पण करू आणि अगरबत्ती लावू आणि पुजारीही नियुक्त करू. मिठाई,फुलेही देऊ. ढोकळा आणि खिचडीचा नैवेद्य देऊ म्हणजे तुम्ही तिथेच बसाल. देवाने खरोखर तुम्हाला पृथ्वीवर पाठवले असेल, तुम्ही देवदूत असाल तर आम्ही तुमचे मंदिर बांधू. मात्र, आता कृपया देशाला त्रास देणे बंद करा. तुमच्या खोटे बोलण्याला मर्यादा असायला हवी. तुमच्या खोटारडेपणाला जनता कंटाळली आहे, असा हल्लाबोलही ममता बॅनर्जी यांनी केला.