केंद्रीय निवडणूक आयोगाने महाराष्ट्र विधान परिषदेच्या शिक्षक आणि पदवीधर मतदारसंघाच्या निवडणुकीचा कार्यक्रम आज जाहीर केला आहे. मुंबई पदवीधर, कोकण विभाग पदवीधर, नाशिक विभाग शिक्षक तसेच मुंबई शिक्षक मतदारसंघ अशा चार जागांसाठी 26 जून रोजी मतदान होणार आहे.
विलास पोतनीस (मुंबई पदवीधर मतदारसंघ), निरंजन डावखरे (कोकण पदवीधर मतदारसंघ) किशोर दराडे (नाशिक शिक्षक मतदारसंघ) आणि कपिल पाटील (मुंबई शिक्षक मतदारसंघ) हे विधान परिषद सदस्य येत्या 7 जुलै रोजी निवृत्त होत आहेत. त्यामुळे या चार जागांवर निवडणुका घेतल्या जाणार आहेत.
31 मे रोजी या निवडणुकीसाठी अधिसूचना जारी केली जाईल. 7 जूनपर्यंत उमेदवारांना अर्ज दाखल करता येईल. 10 जूनला त्या अर्जांची छाननी करण्यात येईल तर 12 जूनपर्यंत उमेदवारी अर्ज मागे घेता येणार आहे. 1 जुलै रोजी मतमोजणी करण्यात येईल, अशी माहिती निवडणूक आयोगाने दिली आहे.
शिवसेनेकडून अनिल परब, ज.मो. अभ्यंकर यांना उमेदवारी
विधान परिषदेसाठी शिवसेनेने दोन उमेदवार जाहीर केले. शिवसेना पक्षप्रमुख उद्धव ठाकरे यांच्या आदेशानुसार मुंबई पदवीधर मतदारसंघातून शिवसेना नेते-आमदार अॅड. अनिल परब तर मुंबई शिक्षक मतदारसंघातून ज. मो. अभ्यंकर यांना उमेदवारी देण्यात आली.
शिवसेना मध्यवर्ती कार्यालयातून प्रसिद्धीस दिलेल्या पत्रकात ही माहिती नमूद करण्यात आली आहे.अनिल परब हे शिवसेनेचे विधानपरिषदेत प्रतिनिधित्व करतात. महाविकास आघाडी सरकारमध्ये परिवहन मंत्री म्हणून त्यांनी यशस्वीपणे जबाबदारी सांभाळली होती. ते रत्नागिरी जिह्याचे पालकमंत्रीही होते. अनिल परब हे 2012 आणि 2018 मध्ये विधानपरिषदेवर निवडून आले होते. त्यांना पुन्हा एकदा शिवसेनेकडून उमेदवारी देण्यात आली आहे.
ज. मो. अभ्यंकर हे शिवसेनेच्या शिक्षक सेनेचे प्रांताध्यक्ष आहेत. शैक्षणिक क्षेत्रातील विविध प्रश्नांवर आणि शिक्षकांच्या समस्यांवर त्यांनी सातत्याने आवाज उठवला आहे. महाराष्ट्र राज्य अल्पसंख्याक आयोगाचे उपाध्यक्ष, महाराष्ट्र राज्य अनुसूचित जाती- जमाती आयोगाचे अध्यक्ष या पदांची धुरा अभ्यंकर यांनी सांभाळलेली आहे. त्यांना शिवसेनेने विधानपरिषदेच्या रिंगणात उतरवले आहे.
.jpeg)
Comment List