लोकसभेनंतर आता विधापरिषदेच्या निवडणुकीची रणधुमाळी; निवडणूक आयोगाकडून तारीख जाहीर

महाराष्ट्रातील लोकसभा निवडणुकीची रणधुमाळी संपल्यानंतर आता शिक्षक आणि पदवीधर निवडणुकीचा बिगुल वाजला आहे. निवडणूक आयोगाने मुंबई आणि कोकण विभागात शिक्षक, पदवीधर मतदार संघाचा निवडणूक कार्यक्रम नव्याने जाहीर केला आहे. याआधी ही निवडणूक 10 जून रोजी घेण्यात येणार होती. परंतु शाळांच्या सुरू असलेल्या उन्हाळी सुट्ट्या आणि गावी गेलेले शिक्षक मतदार या पार्श्वभूमीवर ही निवडणूक पुढे ढकलण्यात आली होती. आता नव्याने तारीख जाहीर करण्यात आली असून शिक्षक, पदवीधर मतदार संघाच्या निडणुकीसाठी 26 जून रोजी मतदान होणार आहे.

राज्यात लोकसभा निवडणुकीची रणधुमाळी सुरू असताना केंद्रीय निवडणूक आयोगाने 8 मे 2024 रोजी महाराष्ट्र विधान परिषदेच्या मुंबई आणि कोकण पदवीधर तसेच मुंबई आणि नाशिक शिक्षक या चार मतदारसंघासाठी निवडणूक जाहीर केली होती. निवडणूक आयोगाच्या कार्यक्रमानुसार या चार मतदारसंघांत 10 जून रोजी मतदान होऊन 13 जूनला मतमोजणी होणार होती. मात्र राज्यातील शाळांच्या उन्हाळी सुट्टय़ा सुरू असून शाळा 10 ते 15 जूनच्या दरम्यान भरणार आहेत. अनेक शिक्षक मतदार उन्हाळी सुट्टीसाठी आपापल्या गावी गेले आहेत. त्यामुळे विधान परिषदेच्या निवडणुका पुढे ढकलाव्यात, अशी मागणी राजकीय पक्ष तसेच लोकप्रतिनिधींकडून करण्यात आली होती. या मागणीचा विचार करून निवडणूक आयोगाने विधान परिषद निवडणुकीची अधिसूचना जारी होण्यापूर्वी निवडणूक पुढे ढकलण्याचा निर्णय घेतला होता.

चौघांचा कार्यकाळ संपणार

या निवडणुकीत मुंबई पदवीधरमध्ये शिवसेनेचे विलास पोतनीस, कोकण पदवीधर भाजपचे निरंजन डावखरे, मुंबई शिक्षकचे कपिल पाटील आणि नाशिक शिक्षक मतदारसंघातील शिवसेनेचे किशोर दराडे यांच्या सदस्यत्वाची मुदत 7 जुलैला संपत आहे. त्यामुळे आयोगाला 7 जुलैपूर्वी निवडणूक घ्यावी लागणार होती. त्यानुसार निवडणूक आयोगाने नव्याने कार्यक्रम जाहीर करत 26 जून रोजी मतदान होईल अशी माहिती दिली.

असा आहे निवडणूक कार्यक्रम

निवडणूक आयोगाने दिलेल्या माहितीनुसार, 31 मे 7 जून पर्यंत अर्ज भरता येणार असून 10 जून रोजी अर्जाची छाननी करण्यात येईल. त्यानंतर 12 जूनपर्यंत अर्ज माघारी घेता येणार आहे. तर 26 जून रोजी मतदान होईल. 1 जुलै रोजी होणार मतमोजणी होऊन निकाल लागेल.