23 जिल्हय़ांमध्ये पाण्याची भीषण टंचाई

राज्यातल्या सर्व प्रमुख धरणांमधील पाणीसाठा 24.03 टक्क्यांवर आला आहे तर दुसरीकडे पाण्याअभावी 23 जिह्यांमध्ये पाण्याची भीषण टंचाई निर्माण झाली आहे. राज्यावर दुष्काळाचे मोठे सावट निर्माण झाले आहे. निवडणुका संपल्याने आता तरी राज्य सरकारने दुष्काळाकडे लक्ष द्यावे अशी मागणी काँग्रेसने केली आहे.

जलसंपदा विभागाने राज्यातील सर्व प्रमुख धरणांमधील पाणीसाठय़ाची माहिती आज जाहीर केली. त्यानुसार राज्यातील सर्व मोठे प्रकल्प, मध्यम प्रकल्प, लघुप्रकल्प अशा एकूण 2 हजार 994 धरणांमध्ये फक्त 24.03 टक्क्यांवर पाणीसाठा आला आहे. गेल्या वर्षी याच दिवशी राज्यातील धरणांमध्ये 34.36 टक्के पाणीसाठा होता.

छत्रपती संभाजीनगरमध्ये भीषण परिस्थिती

या आकडेवारीनुसार सर्वात कमी पाणीसाठा हा छत्रपती संभाजीनगरमध्ये आहे. छत्रपती संभाजीनगरमधील एकूण 920 धरणांमध्ये केवळ 9.73 टक्के पाणीसाठा शिल्लक आहे. केवळ 706.19 दशलक्ष घनमीटर उपयुक्त पाणीसाठा आहे. पुण्यातील एकूण 720 धरणांमध्ये 18.18 टक्के पाणीसाठा शिल्लक राहिला आहे. राज्यात पाणी आणि चाऱयाची अत्यंत भीषण परिस्थिती निर्माण झाली आहे. राज्यात फक्त 45 दिवस पुरेल इतका चारा उपलब्ध असल्याची आकडेवारी सरकारनेच दिली आहे.

राज्यातील या भीषण परिस्थितीवरून काँग्रेस प्रदेशाध्यक्ष नाना पटोले यांनी सरकारला लक्ष्य केले. संपूर्ण राज्य दुष्काळाने होरपळत आहे. पाणीटंचाईवर उपाययोजना करण्याची मागणी आम्ही चार महिन्यांपूर्वीच केली होती, पण राज्यातील भाजप, शिंदे, अजित पवार यांचे सरकार आपसातील कुरघोडय़ा व दुसरे पक्ष पह्डण्यातच व्यस्त असल्याने त्यांनी या प्रश्नाकडे लक्ष दिले नाही. लोकसभा निवडणुकीमुळे शासन व प्रशासन निवडणुकीच्या कामात व्यस्त होते. निवडणूक कार्यक्रम संपल्यामुळे आता सरकारने तातडीने चारा व पाण्याची सोय उपलब्ध करून देण्याची मागणी त्यांनी केली.

नाशिक-कोकण पाणीसाठा

नाशिकमधील 537 धरणांमध्ये 26.34 टक्के पाणीसाठा तर कोकणातील 173 धरणांमध्ये 37.41 टक्के पाणीसाठा शिल्लक असल्याची माहिती पुढे आली आहे.