कोरोनाने पुन्हा एकदा जगाची चिंता वाढवली; FLiRT व्हेरियंटचे देशात 300 तर राज्यात 100 रुग्ण

कोरोनाने जगाला दोन-अडीच वर्षे विळखा घातला होता. या काळात जगाने कोरोनाचा प्रकोप पाहिला. कोरोनाने अनेकांचे बळी घेतले. तसेच कोरोनाने बसलेल्या आर्थिक फटक्यातून अनेक देश सावरण्याचा प्रयत्न करत आहे. आता कोरोना ओसरला असल्याचे समजत जगाने मोकळा श्वास घेतला होता. तोच आता पुन्हा एकदा कोरोनाने जगाची चिंता वाढवली आहे. कोरोना व्हायरसच्या FLiRT व्हेरियंटने जगाची चिंता वाढवली आहे. या व्हेरियंटचे देशात 300 रुग्ण आढळले असून महाराष्ट्रात 100 रुग्ण आढळले आहेत.

सिंगापूरसह जगात काही देशात कोरोनाचा नवा व्हेरिएंट FLiRT आढळला आहे. या व्हेरिएंटने आता देशातही हातपाय पसरायला सुरुवात केली आहे. सिंगापूरमध्ये कोरोना विषाणूच्या ओमायक्रॉन व्हेरियंटच्या FLiRT प्रकाराचे रुग्ण आढळले होते. आता हिंदुस्थानातही कोरोनाच्या फ्लर्ट व्हेरियंटच्या रुग्ण आढळून आले आहेत. देशभरात या व्हेरिएंटचे 300 रुग्ण आढळले असून महाराष्ट्रात 100 रुग्ण आढळले आहेत.

देशात कोरोनाच्या नवीन फ्लर्ट व्हेरियंटच्या 300 हून अधिक रुग्णांची नोंद झाली आहे. यात सर्वाधिक रुग्ण महाराष्ट्रात आढळले आहेत. महाराष्ट्रात ओमायक्रॉनच्या फ्लर्ट व्हेरियंटचे सुमारे 100 रुग्ण आढळले आहेत. देशात फ्लर्ट व्हेरियंटच्या 324 रुग्णांची नोंद झाली आहे. देशात महाराष्ट्रासह गोवा, कोलकाता, ओडिशा, उत्तराखंड, राजस्थान, गुजरात या राज्यांमध्ये नवीन व्हेरियंटचे रुग्ण आढळले आहेत.

FLiRT हा कोरोनाच्या ओमायक्रॉन व्हेरियंटचा उपप्रकार आहे. कोरोनाच्या ओमायक्रॉन व्हेरियंटचे दोन उपप्रकार KP.1 आणि KP.2 आढळून आले आहेत. त्याला FLiRT व्हेरियंट असे नाव देण्यात आले आहे. सिंगापूरमध्ये कोविडच्या या नवीन लाटेच्या उद्रेकानंतर आता हा व्हेरियंट जगभरात पसरत आहे. कोरोनाच्या नव्या लाटेने जगाची चिंता वाढवली आहे. जून महिन्यात शेवटच्या आठवड्यात कोविडच्या नव्या लाटेचा उच्चांक दिसण्याची शक्यता वर्तवण्यात येत आहे. सिंगापूरमध्ये दिवसभारत या व्हेरियंटचे सुमारे 25,000 सक्रिय रुग्ण आढळून येत आहेत. त्यामुळे जगाची चिंता वाढली आहे.