टिळक पुलावरील भिंडेची आठ बेकायदा होर्डिंग्ज उतरवली; महापालिकेची धडक कारवाई सुरूच

घाटकोपरमध्ये भावेश भिंडे याच्या इगो कंपनीने बेकायदेशीरपणे उभारलेल्या महाकाय होर्डिंग दुर्घटनेत 16 जणांचा मृत्यू झाला होता. त्या पार्श्वभूमीवर मुंबई महापालिकेनेही शहरातील बेकायदा होर्डिंगविरोधात जोरदार मोहीम सुरू केली असून दादरमधील टिळक पुलावरील आठ बेकायदा होर्डिंग सोमवारी रात्री उतरवली. ही सर्व होर्डिंग भावेश भिंडे याच्या इगो मीडिया कंपनीची होती.

दादरचा टिळक पूल हा मध्यवर्ती ठिकाणी असल्यामुळे पुलावर राष्ट्रीय आणि आंतरराष्ट्रीय उत्पादनांच्या महाकाय जाहिराती झळकतात. त्यामुळे या जाहिराती लोकांचे लक्ष वेधून घेतात. मात्र, घाटकोपरमधील छेडानगर येथील बेकायदा होर्डिंग दुर्घटनेनंतर मुंबई महापालिकेने आणीबाणी कायद्याअंतर्गत मध्य व पश्चिम रेल्वेला नोटीस बजावत होर्डिंग तत्काळ हटवण्याचे आदेश दिले होते. इगो मीडियाची मुंबईत अनेक ठिकाणी बेकायदा होर्डिंग लावण्यात आली आहेत. दादरच्या टिळक पुलावर या कंपनीची आठ बेकायदा होर्डिंग आढळली. त्यानंतर टिळक पुलावरील वाहतुकीला अडथळा न आणता महापालिकेने कारवाई केली. ही आठ हार्ंडग्ज महापालिकेच्या वॉर्ड स्तरावरील कंत्राटदाराच्या माध्यमातून काढण्यात आल्याची माहिती पालिका प्रशासनाने दिली.

z लोकांचे लक्ष वेधून घेण्यासाठी ये-जा असणाऱया ठिकाणी महाकाय होर्डिंग्ज लावली जातात. आठ होर्डिंगपैकी एका फलकाची लांबी 80 आणि रुंदी 100 फूट आहे. इतर होर्डिंग 30 बाय 40 फुटांची होती.

z मुंबईत रेल्वेने आपल्या हद्दीतील एकाही जाहिरातीचे होर्डिंग लावण्यासाठी महापालिकेची परवानगी घेतलेली नाही तसेच या जाहिरातीसाठी मिळणारे जाहिरात शुल्कही पालिका प्रशासनाकडे भरलेले नाही.

z मुंबईत जास्तीत जास्त 40 फूट बाय 40 फूट आकाराच्या होर्डिंगना महापालिका परवानगी देते. मात्र रेल्वेच्या हद्दीतील होर्डिंग त्यापेक्षा मोठे आहेत, असे महापालिकेने बजावलेल्या नोटिसीत म्हटले होते.

z नोटीस बजावल्यानंतर तीन दिवसांत होर्डिंग तत्काळ हटवण्याचे आदेश पालिकेने नोटिसीत दिले होते. मंगळवारी दिवसभरात आठ होर्डिंग्जवरील जाहिराती आणि नंतर होर्डिंग्जचे लोखंडी सांगाडे काढण्यात आले.