बारावीच्या परीक्षेत मुलींची बाजी; राज्याचा निकाल 93.37 टक्के

यंदाचा बारावीचा संपूर्ण राज्याचा 93.37 टक्के निकाल लागला आहे. सर्व विभागीय मंडळातून नियमित मुलींचा निकाल 95.44 टक्के लागला असून मुलांचा निकाल 91.60 टक्के आहे. म्हणजेच मुलींच्या निकालाची टक्केवारी मुलांपेक्षा 3.84 टक्क्यांनी जास्त आहे. महाराष्ट्र राज्य माध्यमिक आणि उच्च माध्यमिक मंडळाने 15 फेब्रुवारी ते 2 एप्रिल दरम्यान ही परीक्षा घेतला होती. बोर्डाने मंगळवारी परीक्षेचा निकाल जाहीर केला.

विभागनिहाय निकाल

पुणे- 94.44, नागपूर 92.12, छत्रपती संभाजीनगर 94.08, मुंबई 91.95, कोल्हापूर 94.24, अमरावती 93.00, नाशिक 94.71, लातूर 92.36, कोकण 97.51

निकालाची ठळक वैशिष्टये

• या परीक्षेत राज्यातील पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर व कोकण या नऊ विभागीय मंडळांमधून विज्ञान, कला, वाणिज्य व व्यवसाय अभ्यासक्रम व आय.टी.आय. या शाखांसाठी एकूण 14,33,371 नियमित विद्यार्थ्यांनी नोंदणी केली होती. त्यापैकी 14,23,970 विद्यार्थी प्रविष्ट झाले असून त्यापैकी 13,29,684 विद्यार्थी उत्तीर्ण झाले आहेत व निकालाची टक्केवारी 93.37 टक्के आहे.
• या परीक्षेला राज्यातील नऊ विभागीय मंडळांमधून सर्व शाखांमधून एकूण 45,448 पुनर्परिक्षार्थी विद्यार्थ्यांनी नोंदणी केली होती. त्यापैकी 45,083 विद्यार्थी परीक्षेस प्रविष्ट झाले. त्यापैकी 22,463 विद्यार्थी उत्तीर्ण झाले आहेत व त्यांची एकूण निकालाची टक्केवारी 49.82 आहे.
• खाजगी विद्यार्थी म्हणून नोंदणी केलेल्या विद्यार्थ्यांची एकूण संख्या 41,362 एवढी असून त्यापैकी 40,795 विद्यार्थी प्रविष्ट झाले असून 34,988 विद्यार्थी उत्तीर्ण झाले आहेत. त्यांच्या निकालाची टक्केवारी 85.76 आहे.
• या परीक्षेला राज्यातील नऊ विभागीय मंडळांमधून सर्व शाखांमधून एकूण 7032 दिव्यांग विद्यार्थ्यांनी नोंदणी केली होती. त्यापैकी 6986 दिव्यांग विद्यार्थी परीक्षेस प्रविष्ट झाले. त्यापैकी 6581 दिव्यांग विद्यार्थी उत्तीर्ण झाले आहेत व त्यांची एकूण निकालाची टक्केवारी 94.20 टक्के आहे.
• बारावी परीक्षेला नोंदणी केलेल्या पात्र दिव्यांग विद्यार्थ्यांना प्रचलित पध्दतीने सवलतीचे गुण देणेबाबत कार्यवाही करण्यात आलेली आहे.
• सर्व विभागीय मंडळातून नियमित विद्यार्थ्यांचा कोकण विभागाचा निकाल 97.51 टक्के सर्वाधिक असून सर्वात कमी निकाल मुंबई विभागाचा निकाल 91.95 टक्के आहे.