धक्कादायक….भंडारा जिल्ह्यात अंगणवाडी केंद्रात मुदतबाह्य पोषण आहाराचा पुरवठा; पुरवठा कंपनीवर कारवाईची मागणी

>> सूरज बागडे 

भंडारा जिल्ह्यात अंगणवाडी केंद्रात मुदतबाह्य पोषण आहाराचा पुरवठा करण्यात आल्याचा धक्कादायक प्रकार उघडकीस आला आहे. महिला व बालविकास विभाग अंगडवाडीतील चिमुकल्या जिवांशी खेळत असल्याने जिल्ह्यात खळबळ उडाली आहे. या प्रकरणी पुरवठादार कंपनीवर कारवाई करण्याची मागणी होत आहे.

भंडारा जिल्ह्याच्या लाखनी तालुक्यातील रेंगेपार (कोहळी) येथे धक्कादायक घटना उघडकीस आली आहे. अंगणवाडीत मुदतबाह्य पोषण आहार पुरवठा करण्यात आला आहे. ही बाब गावातील नागरिकांच्या लक्षात येताच याची लगेच माहिती अंगणवाडी सेविकांच्या माध्यमांतून महिला बालविकास अधिकाऱ्यांना देण्यात आली. या पोषण आहाराची मुदत एका महिन्याआधीच संपली असताना अंगणवाडी केंद्रात याचा पुरवठा कसा करण्यात आला. ही बाब लक्षात आली नसती तर लहान मुलांच्या आरोग्याचा प्रश्न निर्माण झाला असता. त्यामुळे असा पुरवठा करणाऱ्या कंपनीच्या विरोधात कारवाई करण्याची मागणी होत आहे.

हा प्रकार लक्षात येताच महिला बाल विकास अधिकाऱ्यांनी या प्रकरणाची चौकशी करण्याचे आदेश दिले आहे. आणखी किती अंगणवाडी केंद्रात मुदतबाह्य पोषण आहार पुरवठा केला गेला याची संपूर्ण चौकशी केली जाणार आहे. याबाबतचा अहवाल शासनाला पाठवून पुढील कारवाई करण्यात येणार असल्याचे अधिकाऱ्यांनी सांगितले आहे.