मतदान केंद्रातील असुविधांमुळे कर्मचारी त्रस्त

लोकसभा निवडणुकीच्या पाचव्या टप्प्यात मुंबईत झालेल्या मतदानासाठी निवडणूक आयोगाने निवडणूक कर्मचाऱयांसाठी अत्यंत अपुऱया सुविधा ठेवल्याचे आज स्पष्ट झाले. पिण्यासाठी पाणी नाही, पंखे नव्हते. वेळेवर जेवण-चहा मिळाला नाही अशा असंख्य तक्रारींचा पाढा मतदान केंद्रातील कर्मचाऱयांनी वाचून दाखवला.

मुंबईतील अनेक मतदान केंद्रांवर प्रचंड असुविधा असल्याचे दिसून आले. मतदान केंद्रांवरील कर्मचाऱयांकडून त्याबाबतच्या तक्रारी ऐकायला येत होत्या. हवामान विभागाने उष्णतेच्या लाटेचा इशारा देऊन काळजी घेण्याची सूचना निवडणूक आयोगाला दिली होती, पण तरीही पुरेशी काळजी न घेतल्याचे दिसून आले. अनेक मतदान केंद्रांवर पिण्याच्या पाण्याची सुविधा नव्हती. त्यामुळे मतदान केंद्रांवर काम करणाऱया कर्मचाऱयांच्या घशाला कोरड पडली होती. अनेक मतदान केंद्रांवर पंख्यांची सुविधा नव्हती. त्यामुळे कर्मचाऱयांच्या अंगाची लाहीलाही झाली होती.

‘आपला दवाखाना’ सुविधा नाही

मतदारांना आरोग्य सुविधा देण्यासाठी मतदान केंद्रांवर ‘हिंदुह्रदयसम्राट बाळासाहेब ठाकरे आपला दवाखाना’ची आरोग्य सुविधा पुरवण्याचे आश्वासन निवडणूक आयोगाने दिले होते. पण अनेक मतदारसंघांत ‘आपला दवाखाना’ ही सुविधा उपलब्ध नव्हती. धारावीतील रॉयल सिटी इंग्लिश हायस्कूलमध्ये उष्णतेच्या त्रासामुळे एका महिलेला चक्कर आली. त्यामुळे निवडणूक कर्मचाऱयांची एकच धावपळ झाली.

चहा–जेवण वेळेवर नाही

सकाळी सात वाजता मतदान सुरू झाले, पण त्यानंतर दोन तासांपर्यंत चहा आला नाही. त्यामुळे कर्मचारी कंटाळले होते. काही मतदान केंद्रांवर चहा आला, पण तोही थंड झालेला होता. जेवणही वेळेवर पुरवले नाही अशी सार्वत्रिक तक्रार आहे. जेवणासाठी वाट बघावी लागली अशी कर्मचाऱयांची तक्रार आहे. मतदान पेंद्रांपासून लांब राहणाऱया अनेक कर्मचाऱयांनी मतदान केंद्रांवर रविवारी रात्रीपासूनच मुक्काम केला होता, पण पंख्यांची व स्वच्छतागृहांची चांगली व्यवस्था नसल्याची खासकरून महिला कर्मचाऱयांची तक्रार होती.