गैरसोयींमुळे मतदान केंद्रातच शिवसेनेच्या पोलिंग एजंटचा हार्ट अॅटॅकने मृत्यू

मतदान केंद्रांतील गैरसोयींनी लोकांचे जीवही घेतले. दक्षिण मुंबई लोकसभा मतदारसंघात डिलाईल रोड येथील सखूबाई मोहिते मार्गावरील मतदान केंद्र क्रमांक 175 मध्ये शिवसेनेचे पोलिंग एजंट मनोहर नलगे यांचा हार्ट अॅटॅकने मृत्यू झाला. मतदान केंद्रात मोकळी हवा नसल्याने त्यांना अस्वस्थ वाटत होते. मतदान संपल्यानंतर नलगे शौचालयात गेले आणि तिथेच कोसळले. शौचालयाचा दरवाजा तोडून त्यांना बाहेर काढावे लागले. हार्ट अॅटॅकने त्यांचा मृत्यू झाल्याचे तपासणीनंतर समजले.

मनोहर नलगे हे शिवसेनेचे निष्ठावान कार्यकर्ते होते. प्रत्येक निवडणुकीत त्यांनी पक्षाच्या पोलिंग एजंटची भूमिका बजावली होती, पण आज ते निवडणूक आयोगाच्या गैरव्यवस्थेचे बळी ठरले, असे मत दक्षिण मुंबई मतदारसंघातील शिवसेना उमेदवार अरविंद सावंत यांनी व्यक्त केले.

यापूर्वी कोणत्याही निवडणुकीमध्ये इतकी गैरव्यवस्था नव्हती. आधीच मे महिना, त्यात मतदान केंद्रावर व्हेंटिलेशन नाही, पंखे नाहीत. अशा अवस्थेत घामाने चिंब होऊन नलगे सकाळपासून काम करत होते. त्यामुळेच अस्वस्थ होऊन त्यांना हार्ट अॅटॅक आला, असे सावंत म्हणाले. दक्षिण मुंबईत अनेक मतदान पेंद्रांची अशीच अवस्था होती. ओळखपत्रांमध्ये पुसपट काढून लोकांना माघारी पाठवले जात होते. लोक हैराण होऊन मतदानाला येऊ नयेत किंवा मतदान केंद्रावरून पळून जावेत म्हणून तर निवडणूक आयोगाने मतदारांना जाणीवपूर्वक असा त्रास दिला नाही ना, असा संशय येऊ लागलाय, असे अरविंद सावंत म्हणाले.

कंत्राटदारांना लाखो रुपये देऊनही दुरवस्था

मतदान केंद्रांना पडदे, खुर्च्या, पंखे व अन्य साहित्यासाठी पंत्राटदारांना लाखो रुपये देण्यात आले होते. त्या तुलनेत मतदान केंद्रांवर व्यवस्था केलीच नव्हती. नलगे हे निवडणूक आयोगाच्या अनास्थेचे बळी ठरले आहेत. त्याच मतदान केंद्रावर बाजूच्या बुकमध्ये एक निवडणूक कर्मचारीही भोवळ येऊन कोसळला. त्याला उपचारासाठी नायर रुग्णालयात दाखल करण्यात आले आहे, अशी माहिती आमदार सुनील शिंदे यांनी दिली.