उत्तर पश्चिमची गाडी 53.67 टक्क्यांवर अडकली

उन्हाचा तडाखा आणि त्यातच निवडणूक आयोगाच्या ढिसाळ कारभारामुळे धीम्या गतीने पुढे सरकणाऱया रांगा यामुळे उत्तर पश्चिम मुंबई मतदारसंघात मतदान केंद्राबाहेर मतदारांची मोठी गर्दी झाली होती. दिवसभरात उत्तर पश्चिमची गाडी रखडत 53.67 टक्क्यांवर पोहोचली. गेल्या लोकसभा निवडणुकीपेक्षा यंदा या मतदारसंघात एक टक्क्यांनी मतदान कमी झाले. गेल्या लोकसभा निवडणुकीत येथे 54.37 टक्के मतदान झाले होते.

उत्तर पश्चिम मुंबईतील अंधेरी लोखंडवाला, वर्सोवा, गोरेगाव परिसरात अनेक मराठी आणि हिंदी चित्रपटसृष्टीतील सेलिब्रेटी वास्तव्यास आहेत. या सेलिब्रिटींनी कोणताही बडेजाव न करता सर्वसामान्यांप्रमाणे रांगेत उभे राहून मतदानाचा हक्क बजावला. त्यानंतर या सेलिब्रेटींनी सोशल मीडियावर आपले फोटो पोस्ट करत सर्वांना मतदान करण्याचे आवाहन केले.

ओशिवऱयात भाजपकडून मतदारांना भुलवण्याचे प्रयत्न

ओशिवरा येथील एका मतदान केंद्रावर भाजपच्या आमदार भारती लवेकर आणि भाजप नेत्या दिव्या ढोले जवळपास तासभर मतदारांना भुलवण्याचा प्रयत्न करत होत्या. यावर शिवसेनेच्या पदाधिकाऱयांनी आक्षेप घेतला. त्यामुळे या मतदार केंद्रावर काही काळ गोंधळ निर्माण झाला. अखेर पोलिसांनी मध्यस्थी करत भारती लवेकर, दिव्या ढोले यांना मतदान केंद्राबाहेर काढले.

जोगेश्वरीत तासभर ईव्हीएम बंद

जोगेश्वरी पश्चिम बेहराम बाग येथील एच के कॉलेज या मतदान केंद्रावर सकाळी तासभर ईव्हीएम मशीन बंद पडली होती. त्यामुळे काही काळ गोंधळ उडाला. त्यानंतर संबंधित अधिकाऱयांकडून कार्यवाही करून मतदान प्रक्रिया सुरळीत करण्यात आली.

आयोगाच्या कारभारावर भाग्यश्री संतापली

‘मैने प्यार किया’ फेम अभिनेत्री भाग्यश्री हिने निवडणूक आयोगाच्या संथ कारभारावर नाराजी व्यक्त केली. मतदानासाठी तिला तब्बल दोन तास रांगेत उभे राहावे लागले. बिंबीसार नगर येथील मतदान केंद्रावर मतदानासाठी दोन ते तीस तास लागत असल्यामुळे काहीजण मतदान न करताच घरी परतले. तर मतदार यादीत नाव सापडत नसल्यामुळे काही ठिकाणी मतदार आणि निवडणूक आयोगाच्या अधिकाऱयांमध्ये शाब्दिक चकमक उडाली.