नड्डा म्हणतात, भाजपला संघाची गरज नाही!

भाजपला एकेकाळी संघाची गरज लागायची, पण आता आमचा पक्ष सक्षम आहे. भाजप स्वतःचा कार्यभार स्वतः सांभाळतो, असे भाजपचे राष्ट्रीय अध्यक्ष जे. पी. नड्डा यांनी एका मुलाखतीत नमूद करत भाजपला संघाची गरज नसल्याचे अधोरेखित केले आहे.

राष्ट्रीय स्वयंसेवक संघ आणि भाजपचे संबंध काय याबाबत अनेकदा चर्चा होत असते. संघ परिवारातील संघटनांची भाजपशी असणारी जवळीक अनेकदा दिसून आलेली आहे. असे असतानाही भाजपचे राष्ट्रीय अध्यक्ष जे. पी. नड्डा यांनी ऐन लोकसभा निवडणुकीदरम्यान भाजपला संघाची गरज नसल्याचे भाष्य केले आहे. याबाबत राजकीय वर्तुळात उलटसुलट चर्चा सुरू आहे. सोशल मीडियावर ‘शिवाली हे खरंय’ अशी मिम्स आणि पोस्ट व्हायरल होताना दिसत आहेत.

वाजपेयींच्या काळातील आणि सध्याच्या भाजपमध्ये फरक काय, या प्रश्नाला उत्तर देताना नड्डा म्हणाले, सुरुवातीच्या काळात आम्ही अक्षम असू, थोडे कमी पडत असू तेव्हा आम्हाला आरएसएसची गरज पडत होती. आज आम्ही मोठे झालो आहोत, सक्षम आहोत. त्यामुळे भाजपा स्वतःचा कार्यभार स्वतः सांभाळते. हा या दोन्ही कालखंडातला फरक आहे, असे त्यांनी सांगितले.

भाजपाला आता संघाच्या पाठिंब्याची गरज पडत नाही का? असं विचारलं असता नड्डा म्हणाले, पक्षाची आता वाढ झाली आहे. प्रत्येकाला ज्याची त्याची कर्तव्य आणि भूमिका आहेत. आरएसएस ही एक सांस्कृतिक आणि सामाजिक संघटना आहे. आम्ही राजकीय संघटना आहोत. इथे गरजेचा प्रश्न नाही. आरएसएस ही एक वैचारिक शाखा आहे. ते वैचारिक दृष्टीने आपलं काम करतात, आम्ही आमचं काम करतो. आम्ही आमच्या पद्धतीने आमचं कामकाज पाहतो. हेच तर राजकीय पक्षांनी करायला हवं, असं नड्डा म्हणाले.

काशी, मथुरेत मंदिर बांधण्याची योजना नाही

काशी आणि मथुरेतील वादग्रस्त ठिकाणी मंदिर उभारण्याची कुठलीही योजना नाही, असे जे. पी. नड्डा यासंदर्भातील प्रश्नावर म्हणाले. ना अशी कुठली संकल्पना आहे, ना इच्छा आहे, ना नियोजन… पक्षाचा पह्कस हा महिला, दलित, गरीब आणि तरुणांचा विकास करण्यावर आहे, हे खुद्द मोदींनी ठरवले असल्याचे नड्डा यांनी स्पष्ट केले.