पनवेलमधील मराठी मतदारांची नावे यादीतून गायब झाल्याची चौकशी करा! शिवसेनेची निवडणूक अधिकाऱ्यांकडे मागणी

पनवेल शहरातील शेकडो मराठी मतदारांची नावे यादीतून गायब झाल्याने मावळ लोकसभा मतदारसंघाच्या निवडणुकीत अनेकांना मतदान करता आले नाही. ही नावे गायब होण्यास कोण जबाबदार आहे याची सखोल चौकशी करावी, अशी मागणी शिवसेना (उद्धव बाळासाहेब ठाकरे) पक्षाने निवडणूक आयोगाकडे केली आहे. महापालिका तसेच विधानसभा निवडणुकीपर्यंत तरी चुका दुरुस्त करून यादी अपडेट करावी अशी मागणीही करण्यात आली आहे.

मावळ लोकसभा मतदारसंघात पनवेलचा भाग येत असून 13 मे रोजी झालेल्या मतदानाच्या वेळेस अनेक मराठी व अन्य मतदारांची नावे गहाळ झाल्याचे निदर्शनास आले. मतदारांनी पक्षाकडे यादी व निवडणूक आयोगाच्या संकेतस्थळावरील यादीमध्येही नावे शोधण्याचा प्रयत्न केला. वेगवेगळ्या मतदान केंद्रांवरही जाऊन चौकशी केली, पण कोणताच ठावठिकाणा लागला नाही. या घटनेची शिवसेनेच्या नवीन पनवेल शहर महिला संघटक अपूर्वा प्रभू यांनी दखल घेत निवडणूक अधिकाऱ्यांकडे लेखी तक्रार केली आहे.

महापालिका, विधानसभेला फटका बसण्याची भीती अधिकाऱ्यांना दिलेल्या निवेदनात म्हटले आहे की नवीन पनवेलमधील अनेक मराठी मतदारांकडे ओळखपत्रे आहेत, पण यादीत नाव नाही. विशेषतः ‘एमटी’ या मालिकेतील अनेक मतदारांची नावे नसल्याचे आढळून आले. 2014 मध्ये ज्यांनी नोंदणी केली होती त्यांच्या ओळखपत्रांचे क्रमांक आहेत, पण नाव नाही. मतदार जिथे राहतात त्या शहराऐवजी दुसऱ्याच शहराचे नाव यादीत नमूद केले आहे. या भोंगळ कारभाराचा फटका भविष्यात होणाऱ्या महानगरपालिका व विधानसभेच्या निवडणुकीतही बसण्याची शक्यता आहे. त्यामुळे लवकरात लवकर त्यातील चुका दुरुस्त कराव्यात अशी मागणी अपूर्वा प्रभू यांनी केली आहे. निवेदनासोबत त्यांनी बुथ क्रमांक 346 व 339 यादीतील गहाळ झालेल्या मतदारांच्या नावांची यादीही जोडली आहे.