शिवतीर्थावर महायुतीचा फ्लॉप शो; मोदींचे भाषण सुरू असताना लोक निघाले

लोकसभा निवडणुकीच्या प्रचारासाठी शिवाजी पार्कवर आयोजित महायुतीच्या सभेचा आज फ्लॉप शो पाहायला मिळाला. पंतप्रधान नरेंद्र मोदी यांचे भाषण पूर्ण होण्याच्या आधीच लोकांनी काढता पाय घेण्यास सुरुवात केली. शिवाजी पार्क मैदानातील शेवटच्या भागातील अनेक खुर्च्या रिकाम्या होत्या. मोदींच्या सभेला मुंबईकरांचा कमी प्रतिसाद मिळाल्याचे चित्र आज दिसून आले.

लोकसभा निवडणुकीच्या पाचव्या आणि राज्यातील शेवटच्या टप्प्यातील निवडणूक प्रचारासाठी छत्रपती शिवाजी महाराज मैदानावर पंतप्रधान नरेंद्र मोदी यांची सभा झाली. या सभेला मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार, मनसे अध्यक्ष राज ठाकरे यांच्यासह महायुतीचे उमेदवार व नेते उपस्थित होते. पण सभेला मुंबईकरांचा प्रतिसाद कमी मिळाला, कारण सभेतील मागील खुर्च्या रिकाम्या दिसत होत्या.

विकासाऐवजी मोदींवर स्तुतिसुमने

महायुतीच्या नेत्यांनी निवडणूक प्रचारात विकासाच्या मुद्यावर भाषण करण्याऐवजी मोदींवर स्तुतिसुमने उधळली. मुख्यमंत्री एकनाथ शिंदे भाषण करताना भाजप कार्यकर्त्याच्या भूमिकेत शिरले होते. उपमुख्यमंत्री अजित पवारांनीही त्यांच्या भाषणात मोदींवर स्तुतिसुमने उधळली.

मोदींची फेकूगिरी

या सभेत भाषण करताना पंतप्रधान नरेंद्र मोदी यांनी आश्वासनांची खैरात केली. देशातील 70 वर्षांपेक्षा जास्त वयाच्या प्रत्येक व्यक्तीच्या आरोग्यावरील खर्च मोदी सरकार करील. देशातील पहिली बुलेट ट्रेन मुंबईला मिळणार असा दावा केला.

 

View this post on Instagram

 

A post shared by Saamana (@saamana_online)

विकसित भारत झाल्यावर जाणार

मी परत येईन तेव्हा देश जगातील तिसरी आर्थिक महासत्ता झालेली दिसेल. मी विकसित भारत देऊन जाईन अशी घोषणा त्यांनी केली.

सभेला मनसेच्या पाठिंब्याचा टेकू

मोदींच्या सभेच्या  गर्दीला मनसेच्या पाठिंब्याचा टेकू मिळाला होता. मनसेच्या कार्यकर्त्यांची संख्याच अधिक होती. यावेळी राज ठाकरे यांनी मोदींकडे पाच-सहा मागण्या मांडल्या त्यात मराठी भाषेला अभिजात दर्जा देण्याची मागणी, मुंबई-गोवा महामार्ग, शिवछत्रपतींच्या गडकिल्ल्यांना पूर्वीचे वैभव प्राप्त करून देण्याबरोबरच मुंबईतील लोकल सेवा सुधारण्याची मागणी केली.

मशालीसमोर मोदी नतमस्तक

या सभेनंतर नरेंद्र मोदी यांनी हिंदुहृदयसम्राट शिवसेनाप्रमुख बाळासाहेब ठाकरे यांच्या स्मृतिस्थळावर जाऊन त्यांनी अभिवादन केले. स्मृतिस्थळावरील धगधगत्या मशालीसमोर मोदी नतमस्तक झाले.

शिंदेंनी भाषणाचे मुद्दे हातावर लिहिले

या सभेत मुख्यमंत्री एकनाथ शिंदे यांनी कागदावर लिहून आणलेले भाषण वाचून दाखवले. एवढेच नव्हे तर, डाव्या तळहातावरही भाषणाचे मुद्दे लिहिले होते. भाषण करताना तळहात पाहून मुद्दे मांडताना दिसत होते.