नगरमध्ये कालव्यात कुजलेल्या अवस्थेत सापडले मृतदेहाचे तुकडे; परिसरात भीतीचे वातवरण

नगर जिल्ह्यामधून एक धक्कादायक घटना उघडकीस आली आहे. नेवासा तालुक्यात पाण्यामध्ये सडलेल्या अवस्थेत एका व्यक्तीचा मृतदेह सापडल्याने परिसरात एकच खळबल उडाली आहे.

नेवासा तालुक्यातील बालाजी देडगाव येथून पाथर्डीकडे जाणाऱ्या पाण्याच्या पाटामध्ये सडलेल्या अवस्थेत एका व्यक्तीचा मृतदेह सापडला आहे. त्यामुळे परिसरात एकच खळबल उडाली असून भीतीचे वातावरण निर्माण झाले आहे. मिळालेल्या माहितीनुसार पाथर्डीकडे जाणाऱ्या पाण्याच्या पाटामध्ये प्रथम एक मानवी पायाचा मांसाचा तुकडा पाण्यावर तरंगत असल्याचे आढळून आले. त्यानंतर संबंधित घटनेची माहिती पोलिसांना देण्यात आली. पोलिसांनी घटनास्थळी जाऊन पाहणी केली असता पाटाच्या पूर्व दिशेला कुजलेल्या अवस्थेत मानवी पायाचा तुटलेला मांसाचा भाग आढळून आला. तिथून पुढे काही अंतरावर पिवळ्या रंगाच्या गोणीमध्ये पुरुषाचे मुंडके आणि धडाचा कुजलेला मांसाचा तुकडा सापडला. पोलिसांनी मृतदेहाचे तुकडे तपासणीसाठी पाठवले आहेत. मृतदेहाची ओळख अद्याप पटलेली नाही. त्यामुळे खुनाचा उलगडा करण्याचे मोठे आव्हान पोलिसांसमोर आहे.

सदर घटनेबाबात बालाजी देडगावचे पोलीस पाटील प्रल्हाद यशवंत ससाने यांनी नेवासा पोलीस स्थानकात फिर्याद दिली. सदर घटनेबाबात काही माहिती असल्यास नेवासा पोलिसांशी संपर्क साधावा. त्या व्यक्तीचे नाव गोपनीय ठेवले जाईल, असे आवाहन पोलीस निरीक्षक धनंजय जाधव यांनी केले आहे.