गुंगीचं औषध देऊन अल्पवयीन मुलीवर अत्याचार; शिवप्रतिष्ठान युवा हिंदुस्थान संघटनेने फोडले तीन कॅफे

सांगलीत एक धक्कादायक घटना उघडकीस आली आहे. एका कॅफेमध्ये अल्पवयीन मुलीला गुंगीचे औषध देऊन तिचे अश्लील व्हिडीओ बनवले. त्यानंतर ते व्हिडीओ व्हायरल करण्याची धमकी देऊन तिच्यावर अत्याचार केल्याची संतापजनक घटना घडली आहे. या प्रकारामुळे कॅफेत गैरप्रकार होत असल्याचे समोर आले. यानंतर शिवप्रतिष्ठान युवा हिंदुस्थानच्या कार्यकर्त्यांकडून कॅफेची तोडफोड करण्यात आली आहे.

सांगलीतील कॅफे ‘हँग ऑन’ येथे ही घटना घडली आहे. शंभर फुटी रस्त्यावरील कॅफे ‘हँग ऑन’मध्ये पीडित अल्पवयीन मुलीला गुंगीचे औषध देऊन तिचे अश्लील व्हिडीओ बनवले. त्यानंतर ते व्हिडीओ व्हायरल करण्याची धमकी देऊन तिच्यावर अत्याचार केले. या घटनेने सांगलीत एकच खळबळ उडाली. आता या घटनेचे पडसाद उमटले आहे. या घटनेनंतर शिवप्रतिष्ठान युवा हिंदुस्थानचे कार्यकर्ते आक्रमक झाले असून त्यांनी शुक्रवारी तीन कॅफेंची तोडफोड केली.

या घटनेबाबत शिवप्रतिष्ठान युवा हिंदुस्थानचे पदाधिकारी दिगंबर साळुंखे यांनी प्रतिक्रिया दिली आहे. गेल्या दोन वर्षांपासून आम्ही अनधिकृत कॅफे बंद करण्याची मागणी प्रशासनाकडे करत आहोत. कॅफेमध्ये गैरप्रकार होत असल्याचे प्रकार लक्षात घेऊन मागणी केली होती. सहा महिन्यांपूर्वी अशीच घटना समोर आली होती. एका कॅफेमध्ये अल्पवयीन मुलीचे शोषण केले आणि त्याचा व्हिडीओ सोशल मीडियावर व्हायरल करण्याची धमकी देत त्या मुलीवर वारंवार बलात्कार करण्यात आला. सहा महिन्यांपासून आम्ही या गोष्टीचा पाठपुरावा करत आहे. तक्रार केली तरी संबंधित कॅफे चालकाने जे करायचे ते सुरुच ठेवले होते. सहा महिन्यांतील ही दुसरी घटना आहे. आता यापुढे आम्ही शांत बसणार नाही. आता अशा पद्धतीचे कॅफे जिथे सुरू असतील ते फोडून बंद करण्यात येईल, असा इशाराच शिवप्रतिष्ठान युवा हिंदुस्थान संघटनेच्या दिगंबर साळुंखे यांनी दिला आहे.