बारामतीनंतर शिरूरमध्ये EVM ठेवलेल्या स्ट्राँग रुमचे CCTV बंद; रोहित पवारांचा अजित पवार गटाकडे इशारा

लोकसभा निवडणुकीच्या चौथ्या टप्प्यात शिरूर मतदारसंघामध्ये मतदान प्रक्रिया पार पडली. या मतदारसंघातील ईव्हीएम स्ट्राँग रुममध्ये सुरक्षित ठेवण्यात आले आहेत. या सर्व ईव्हीएमवर सीसीटीव्हीच्या माध्यमातून लक्ष ठेवण्यात येत आहे, मात्र या स्ट्राँग रुमचे सीसीटीव्ही 24 तास बंद ठेवल्याचा धक्कादायक प्रकार उघडकीस आला आहे. यामुळे एकच खळबळ उडाली असून राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी ट्विट करत अजित पवार गटाकडे सूचक इशारा केला आहे.

बारामतीनंतर आता शिरूर लोकसभा मतदारसंघाच्या ईव्हीएम मशीन ठेवलेल्या स्ट्रॉंग रूमचे सीसीटीव्ही 24 तास बंद ठेवल्याचा प्रकार समोर आला आहे. आपल्याला एकही जागा जिंकता येणार नाही हे लक्षात आल्यानेच एका गटाकडून तर हे केले जात नाही ना? असा सवाल उपस्थित करत रोहित पवार यांनी अजित पवार गटाकडे इशारा केल्याची राजकीय वर्तुळात चर्चा आहे. प्रशासनाने स्ट्रॉंग रूमची सुरक्षा वाढवून गेल्या 24 तासात सीसीटीव्ही का बंद ठेवण्यात आले याची चौकशी करावी, अशी मागणीही रोहित पवार यांनी ट्विटद्वारे केली आहे.

दरम्यान, ईव्हीएम ठेवलेल्या स्ट्राँग रुमचे सीसीटीव्ही डिस्प्ले 24 तास बंद होते. हा सगळा प्रकार वरिष्ठ अधिकाऱ्यांच्या लक्षात आल्यानंतर त्यांनी तातडीने सीसीटीव्ही डिस्प्ले सुरू केले अशी माहिती माध्यमांनी दिली आहे. मात्र या प्रकारामुळे राष्ट्रवादीचे नेते आणि कार्यकर्त्यांच्या मनात संशयाची पाल चुकचुकली हे नक्की.

बारामतीत काय घडलेले?

लोकसभा निवडणुकीच्या तिसऱ्या टप्प्यात बारामती मतदारसंघात मतदान पार पडले. या मतदारसंघातील सर्व ईव्हीएम कोरेगाव पार्क येथील फूड कॉर्पोरेशनच्या गोदामाच्या ठिकाणी स्ट्राँग रूममध्ये सुरक्षित ठेवण्यात आली आहेत. या सर्व ईव्हीएमवर सीसीटीव्ही पॅमेऱयांच्या माध्यमातून निगराणी ठेवली जात आहे, मात्र सोमवारी सकाळी या स्ट्राँग रूमच्या बाहेर असलेल्या मॉनिटरवर दिसणारे सीसीटीव्ही फुटेज अचानक बंद झाल्याची घटना घडली. त्यामुळे स्ट्राँग रूमबाहेर पाहरा देणाऱ्या कार्यकर्त्यांत एकच खळबळ उडाली. सुप्रिया सुळे यांचे निवडणूक प्रतिनिधी लक्ष्मीकांत खाबिया यांनी यासंदर्भातील एक व्हिडीओ सोशल मीडियावर शेअर करत झाल्या प्रकाराला वाचा फोडली. तसेच यासंदर्भात निवडणूक आयोगाकडेही तक्रार केली. यानंतर संबंधित विभागाच्या अधिकाऱयांनी घटनास्थळाची पाहणी करून सीसीटीव्ही यंत्रणा पूर्ववत सुरू केली.