IPL 2024 – क्रिकेटच्या मैदानात रंगला कुस्तीचा खेळ! ईशान किशन-टीम डेव्हिडचा व्हिडिओ व्हायरल

आयपीएल 2024 च्या हंगामातील शेवटचा सामना खेळण्यासाठी सज्ज असलेली मुंबई इंडियन्स आधीच प्लेऑफच्या शर्यतीतून बाहेर पडली आहे. आता 17 मे रोजी शुक्रवारी मुंबईतील वानखेडे स्टेडियमवर लखनौ सुपर जायंट्सविरुद्ध मुंबई इंडियन्स असा सामना रंगणार आहे. यासाठी मुंबईचे सगळे खेळाडू जय्यत तयारी करत आहेत. यावेळी मुंबई इंडियन्सचा विकेटकीपर ईशान किशन आणि विस्फोटक फलंदाज टीम डेव्हिड मैदानार कुस्ती खेळताना दिसले. मुंबई इंडियन्सने कुस्तीचा व्हिडिओ पोस्ट केला आहे. यामध्ये ईशान आणि टीम कुस्ती खेळताना दिसत आहेत. त्यांचा हा व्हिडिओ तुफान व्हायरल होत आहे.

मुंबई इंडियन्सने आपल्या सगळ्या सोशल मीडिया अकाऊंटवर हा व्हिडिओ शेअर केला आहे. या व्हिडिओमध्ये ईशान किशन आणि टीम डेव्हिड एकमेकांना टक्कर देताना दिसत आहेत. ईशान टीम डेव्हिडला हरवण्यासाठी सर्वोतपरी प्रयत्न करताना दिसत आहे. मात्र दोघेही तितक्याच ताकदीने एकमेकांना हरवण्याचा प्रयत्न करत आहेत. दोघांमध्ये झुंज सुरू असताना फलंदाजी कोच कायरन पोलार्डही तिथं उपस्थित असल्याचे व्हिडिओत दिसत आहे.

मुंबई इंडियन्सने शेअर केलेल्या या व्हिडिओला चाहत्यांनी प्रचंड प्रतिसाद दिला आहे. यामध्ये काही जण ईशानला सपोर्ट करत आहेत. काही जण टीम डेव्हिडला सपोर्ट करताना दिसत आहे. या व्हिडिओमध्ये सगळे खेळाडू आनंदी दिसत आहेत. मात्र मुंबई इंडियन्सचे काही चाहते या खेळांडूवर नाराज आहेत. कारण हार्दिक पांड्याच्या नेतृत्वातील मुंबई इंडियन्सची यंदाच्या हंगामात खराब कामगिरी झाली. आयपीएल 2024 मध्ये आव्हान संपणारा मुंबईचा पहिला संघ ठरला होता. मुंबईला 13 सामन्यात फक्त चार विजय मिळवता आले.