जेट एअरवेजचे संस्थापक नरेश गोयल यांच्या पत्नीचे निधन, कर्करोगाशी झुंज अपयशी

जेट एअरवेजचे संस्थापक नरेश गोयल यांच्या पत्नी अनिता गोयल यांचे गुरुवारी सकाळी निधन झाले आहे. त्या दीर्घकाळ कर्करोगाशी झुंज देत होत्या. त्यांना श्वास घेण्यास त्रास होत होता. नरेश गोयल यांना नुकतेच अंतरिम जामीन मंजूर झाला होता. गुरुवारी पहाटे तीन वाजता अनिता गोयल यांचे निधन झाल्याचे कुटुंबीयांच्या निकटवर्तीयांनी सांगितले. गुरुवारी त्यांच्या पार्थिवावर अंत्यसंस्कार होणार आहेत. नरेश गोयल हे देखील कर्करोगाने ग्रस्त आहेत.

कोटय़वधी रुपयांच्या घोटाळ्याप्रकरणी नरेश गोयल  तुरुंगात होते. त्यांची पत्नी यांना कर्करोग असल्याने त्या जेमतेम दोन महिन्यांच्या सोबती होत्या. अंतिम क्षणी तिच्या सोबत राहाण्यासाठी त्यांना अंतरिम जामीन मंजूर करावा, अशी विनंती गोयल यांनी केली होती. ही विनंती न्यायालयाने मान्य केली होती. त्यामुळे अनिता गोयलच्या अखेरच्या क्षणी नरेश गोयल त्यांच्यासोबत होते. अनिता गोयल यांच्यावर गुरूवारी अंत्यसंस्कार करण्यात येणार आहे. नरेश गोयल यांना नम्रता आणि निवान अशी दोन मुलं आहेत. शिवाय नरेश गोयल हे स्वत: देखिल कर्करोगाशी झुंज देत आहेत.

नरेश गोयल यांनी सहा महिन्यांपूर्वी जामीन याचिका दाखल केली होती. मुंबई उच्च न्यायालयाने नरेश गोयल यांना दोन महिन्याची अंतरिम मेडिकल बेल देण्यात आली आहे. न्या. एन. आर. जमादार यांच्या एकल पीठाने गोयल यांना सर्शत एक लाख रुपयांचा अंतरिम जामीन मंजूर केला होता. शिवाय न्यायालयाच्या परवानगीशिवाय मुंबई सोडून जाऊ नये. पासपोर्ट पोलिसांकडे जमा करावा, अशा अटी न्यायालयाने गोयल यांना घातल्या.