घाटकोपर दुर्घटनेतील मृतांचा आकडा 16 वर, होर्डिंगखाली अडकलेले मृतदेह कुजण्यास सुरुवात

घाटकोपर येथे होर्डिंग कोसळून झालेल्या दुर्घटनेतील मृतांचा आकडा 16 वर पोहोचला आहे. गेल्या 54 तासांपासून येथे युद्धपातळीवर शोधकार्य सुरू असून बुधवारी मध्यरात्री आणखी दोघांचे मृतदेह सापडले. दुर्घटनेस बराच काळ उलटून गेल्याने आणि पावसामुळे भिजल्यामुळे मृतदेह कुजण्यास सुरुवात झाली आहे. अद्यापही होर्डिंग आणि पेट्रोल पंपाच्या ढिगाऱ्याखाली 30 ते 40 जण अडकल्याची शक्यता असून मृतांचा आकडा आणखी वाढण्याची भीती व्यक्य केली जात आहे.

सोमवारी सायंकाळच्या सुमारास मुंबईमध्ये वादळी वाऱ्यासह पावसाने धुमाकूळ घातला होता. यावेळी घाटकोपर येथे भले मोठे होर्डिंग रस्त्यावर आणि बाजुच्या पेट्रोल पंपावर कोसळले. या दुर्घटनेमध्ये सुरुवातीला 14 जणांचा मृत्यू झाल्याचे समोर आले होते. होर्डिंग आणि पेट्रोल पंपाच्या ढिगाऱ्याखाली अडकलेल्या लोकांना बाहेर काढण्यासाठी एनडीआरएफ, महापालिकेची आपत्ती व्यवस्थापन सेवा, अग्निशमन दलाकडून बचावकार्य सुरू आहे.

दरम्यान, आतापर्यंत 50 टक्के ढिगारा उपसण्यात आला असून बुधवारी मध्यरात्री आणखी दोन मृतदेह हाती लागले. मनोज चनसूर्या (वय – 60) आणि त्यांची पत्नी अनिता चनसूर्या (वय – 59) अशी मृतांची नावे आहेत. हे दोघेही मध्य प्रदेशला आपल्या मूळ गावी निघालेले असताना घाटकोपर येथील पेट्रोल पंपावर पेट्रोल भरण्यासाठी थांबले होते. त्याचवेळी होर्डिंग कोसळले आणि त्याखाली चनसूर्या दाम्पत्य अडकले होते. त्यांचे मृतदेह आता सापडले असून शवविच्छेदनासाठी पालिकेच्या रुग्णालयात पाठवण्यात आले आहेत.

 

View this post on Instagram

 

A post shared by Saamana (@saamana_online)