होर्डिंगशी उद्धव ठाकरे यांचा संबंध नाही

मुंबईत होर्डिंग कोसळून झालेली दुर्घटना ही गंभीर आहे. यात उगाच कोणी राजकारण आणण्याचा प्रयत्न करू नये. शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांचा या होर्डिंगशी काही संबंध नाही, अशा शब्दांत मंत्री छगन भुजबळ यांनी टीकाकारांना सुनावले आहे. मुंबईत सोमवारी घाटकोपरमध्ये होर्डिंग कोसळून मोठी दुर्घटना झाली. यात चौदा जणांचा मृत्यू झाला, अनेकजण जखमी झाले. होर्डिंग प्रकरणातील भावेश भिंडे याचा उद्धव ठाकरे यांच्याबरोबरचा पह्टो ट्विट करून भाजपा आमदार राम कदम यांनी बिनबुडाचे आरोप केले. याबाबत छगन भुजबळ यांना प्रसारमाध्यमांच्या प्रतिनिधींनी विचारले असता ते संतापले. होर्डिंगशी उद्धव ठाकरे यांचा संबंध काय, असा सवालच त्यांनी केला. धंदेवाईक, व्यावसायिक लोक सर्व ठिकाणी जात असतात, मिठाई, पुष्पगुच्छ देऊन पह्टो काढतात. माझ्याकडे तर कोणीही येतं, त्यांना नाही म्हणू शकत नाही. ते कार्यकर्ते आहेत की नाही हे माहिती नसतं. यात उगाच राजकारण आणण्याचा प्रयत्न कुणी करू नये, असे त्यांनी सुनावले. या दुर्घटनेला जबाबदार असणाऱयांवर कडक कारवाई व्हायलाच हवी. शासनाने त्यांच्या वारसांना पाच लाख रुपये दिले म्हणजे सर्व संपलं का, असेही ते म्हणाले.