26/11च्या हल्ल्यातील आरोपी पाकिस्तानात मोकाट, हे भाजपचं अपयश; सचिन सावंत यांची टीका

कसाबला फाशी दिली गेली त्यावेळी केंद्रात आणि राज्यात काँग्रेसचे सरकार होते हे उज्ज्वल निकम विसरले आहेत. कसाबच्या विरोधातील वकील म्हणून निकम यांची नियुक्ती काँग्रेस सरकारने केली होती. हे निकम सांगत नाहीत. हा खटला अजूनही प्रलंबित आहे. ’26/11’च्या हल्ल्यातील आरोपी पाकिस्तानात अद्यापही मोकाट आहेत. हे भाजपचे अपयश आहे, अशा शब्दात काँग्रेसचे प्रवक्ते सचिन सावंत यांनी हल्लाबोल केला.

मुंबईवरील ’26/11″ च्या हल्ल्यात पाकिस्तानचा हात असल्याचे उपमुख्यमंत्री देवेंद्र फडणवीस यांच्यामुळेच सिद्ध करू शकलो, असे वक्तव्य उत्तर-मध्य मुंबई लोकसभा मतदारसंघातील भाजपचे उमेदवार अॅड. उज्ज्वल निकम यांनी केले आहे. या वक्तव्याचा सचिन सावंत यांनी निषेध केला. 21 नोव्हेंबर 2012 ला कसाबला फाशी दिली गेली त्यावेळी केंद्रात आणि राज्यात काँग्रेसचे सरकार होते हे निकम विसरले असतील. निकम यांची कसाबविरोधात नियुक्ती काँग्रेसच्या सरकारने केली होती हे निकम सांगत नाहीत, पण निकम यांचे कौशल्य कमी पडल्यानेच कसाबबरोबर दोषी असलेले फहीम अन्सारी व सबाउद्दीन शेख हे दोन आरोपी सुटले. ही वस्तुस्थितीही निकम यांनी सांगितली पाहिजे. अजूनही हा खटला प्रलंबित का? याचे उत्तर द्या. पाकिस्तानात अजूनही ’26/11’चे आरोपी मोकाट आहेत असे भारत सरकारने युनोमध्ये सांगितले हे भाजपचे अपयश आहे, अशा शब्दात सचिन सावंत यांनी निकम यांचा समाचार घेतला.