चौथ्या टप्प्यातील मतदानावरही उष्णतेच्या लाटेचे सावट

लोकसभा निवडणुकीच्या पहिल्या तीन टप्प्यांप्रमाणे उद्या होणाऱया चौथ्या टप्प्यातील मतदानावरही उष्णतेच्या लाटेचे सावट कायम आहे. नंदुरबार, जळगाव, रावेरमधील तापमान उद्या 41 अंश सेल्सिअसपर्यंत जाण्याची शक्यता हवामान खात्याने निवडणूक आयोगाला पाठवलेल्या अहवालात वर्तवली आहे. त्याचबरोबर बहुतांश मतदारसंघात दुपारी व संध्याकाळी गडगडाटासह पावसाच्या सरींची शक्यताही वर्तवण्यात आली आहे.

राज्यात सध्या उष्णतेची लाट आहे. उष्णतेच्या लाटेमुळे पहिल्या तीन टप्प्यांतील मतदानावर परिणाम झाल्याचे सांगितले गेले. रखरखत्या उन्हामुळे दुपारच्या वेळेत मतदान कमी झाले. उन्हाची तीव्रता कमी झाल्यानंतर मतदार मतदानासाठी बाहेर पडले. त्यामुळे संध्याकाळी पाचच्यानंतर मतदान पेंद्रांबाहेर रांगा लागल्याचे अनेक भागात दिसून आले. आता चौथ्या टप्प्यातही उष्णतेच्या लाटेचा फटका बसण्याची शक्यता व्यक्त करण्यात आली.

– उन्हात बराच काळ बाहेर राहू नका, भरपूर पाणी प्या, पावसात विजा चमकत असतील आणि गडगडाट होत असेल तर झाडे किंवा शेडच्या खाली आसरा घेऊ नका अशा सूचना हवामान खात्याने जारी केल्या आहेत. उष्णतेच्या लाटेची शक्यता गृहित धरून निवडणूक आयोगानेही विविध उपाय योजले आहेत. मेघगर्जनेसह पाऊस असल्यास त्या काळात इलेक्ट्रॉनिक्स आणि इलेक्ट्रिकल वस्तूंचा वीजपुरवठा खंडित करण्याची सूचना हवामान खात्याने केली आहे.

ढगाळलेले आकाश आणि पावसाच्या सरी

या 11 मतदारसंघांपैकी काही मतदारसंघांत पावसाची शक्यताही आहे. आकाश काही अंशी ढगाळलेले राहील. काही ठिकाणी वादळी वाऱयाची शक्यता वर्तवण्यात आली आहे. हवेतील आर्द्रताही वाढण्याची शक्यता आहे.

मतदारसंघ आणि सरासरी तापमान

   नंदुरबार       39 ते 41 अंश से.

   जळगाव        39 ते 41 अंश से.

   रावेर            39 ते 41 अंश से.

   जालना         37 ते 39 अंश से.

   संभाजीनगर 37 ते 39 अंश से.

   मावळ          35 ते 37 अंश से.

   पुणे              35 ते 37 अंश से.

   शिरुर           35 ते 37 अंश से.

   नगर            35 ते 37 अंश से.

   शिर्डी           38 ते 40 अंश से.

   बीड             38 ते 40 अंश से.