पाकव्याप्त काश्मीरमध्ये युद्धजन्य परिस्थिती; महागाईविरोधात नागरिक रस्त्यावर

पाकव्याप्त काश्मीरमध्ये विजेचे वाढणारे दर आणि पिठाच्या किमतींवरून प्रचंड वाद सुरू आहे. त्यामुळे तेथील सध्याची परिस्थिती चिंताजनक आहे. खाद्यपदार्थांच्या वाढत्या किमतींविरोधात निदर्शने करणाऱ्या सुरक्षा दल आणि आंदोलकांमध्ये गदारोळ सुरु आहे. आंदोलकांनी दगडफेक आणि बाटल्यांचा मारा सुरू केल्यानंतर पोलिसांनी अश्रुधुराच्या नळकांड्या फोडल्या. तसेच हवेत गोळीबार करून परिस्थिती नियंत्रणात आणण्याचा प्रयत्न केला. मात्र या चकमकीत एक पोलीस अधिकारी शहीद झाला तर 100 हून अधिक लोक जखमी झाले. जखमींमध्ये बहुतांश लोक पोलीस आहेत.

वीज आणि पिठाच्या किमतीत वाढ झाल्याने गदारोळ

वीज आणि पिठाच्या किमती वाढल्यानंतर पाकव्याप्त कश्मिरात नागरिकांचा संयम सुटला आहे. JAAC विजेच्या वाढलेल्या किमती, गव्हाच्या पिठावर सबसिडी आणि उच्चभ्रू वर्गाचे विशेषाधिकार बंद करण्याची मागणी करत आहे. निदर्शनांच्या पार्श्वभूमीवर, रविवारी भिंबर आणि बाग शहरांसह पीओकेच्या विविध भागांमध्ये मोबाइल फोन आणि इंटरनेट सेवा निलंबित करण्यात आल्या. मुझफ्फराबाद, धोड्याल, कोटली आदी भागात गेल्या दोन दिवसांपासून जनजीवन ठप्प झाले आहे. अनेक ठिकाणी नागरिकांचे चक्का जाम आंदोलन सुरू आहे. दरम्यान, पाकिस्तानचे अध्यक्ष आसिफ अली झरदारी यांनी सोमवारी राष्ट्रपती भवनात प्रदेशातील परिस्थितीशी संबंधित तातडीची बैठक बोलावली आहे.

मिरपूरचे वरिष्ठ पोलिस अधीक्षक (एसएसपी) कामरान अली म्हणाले की, पीओकेमध्ये पोलीस आणि आंदोलकांमध्ये चकमक झाली. हा वाद नियंत्रणात आणणे कठीण आहे. तेथील संपूर्ण जनता रस्त्यावर उतरली आहे. यावेळी हे प्रकरण आटोक्यात आणण्याचा पोलिसांनी प्रयत्न केला. आंदोलकांनी दगडफेक आणि बाटल्या फेकल्यानंतर काही भागात पोलिसांनी अश्रुधुराच्या नळकांड्या फोडल्या. तसेच हवेत गोळीबार केला. दरम्यान इस्लामगढ शहराचे उपनिरीक्षक अदनान कुरेशी यांच्या छातीत गोळी लागली आणि त्यांचा मृत्यू झाला.

दरम्यान, पीओकेचे पंतप्रधान चौधरी अन्वारुल हक म्हणाले की, मीरपूरमध्ये हिंसक निदर्शने झाल्यानंतर एक अधिकारी ठार झाला असून 70 हून अधिक जखमी झाले आहेत. सरकार वीज आणि गव्हाच्या पिठाच्या किमतीत सवलत देण्यास तयार आहे. दरम्यान, अधिकाऱ्यांनी सर्व जिल्ह्यांमध्ये सार्वजनिक मेळावे, रॅली आणि मिरवणुकांवर बंदी घातली आहे.