20 वर्षांनंतर सौर वादळ पृथ्वीवर धडकले! आकाशात दिसल्या रंगीबेरंगी छटा

जगातील सर्वात शक्तिशाली सौर वादळ 20 वर्षांनंतर शुक्रवारी पृथ्वीवर धडकले. या वादळामुळे टास्मानियापासून ब्रिटनपर्यंत आकाशात जोरदार विजा चमकत होत्या. यामुळे उपग्रह आणि पॉवर ग्रीडचेही नुकसान झाले. सौर वादळामुळे जगातील अनेक ठिकाणी अरोराच्या घटनाही पाहायला मिळाल्या. या वेळी सौर वादळामुळे आकाशात वेगवेगळय़ा रंगांच्या छटा उमटल्या. काही ठिकाणी आकाश हे रंगीबेरंगी दिसत होते. हे पाहण्यासाठी अनेक ठिकाणी लोकांनी गर्दी केली होती. ‘नॅशनल ओशनिक अँड ऍटमॉस्फेरिक ऍडमिनिस्ट्रेशन’ (एनओएए) या अमेरिकन वैज्ञानिक संस्थेच्या म्हणण्यानुसार, या सौर वादळाचा प्रभाव आठवडय़ाच्या शेवटपर्यंत राहील. हे प्रामुख्याने जगाच्या उत्तरेकडील आणि दक्षिणेकडील भागात पाहिले जाऊ शकते, पण जर ते मजबूत असेल तर ते इतर अनेक ठिकाणी दिसून येते. जगभरातील सॅटेलाईट
ऑपरेटर, एअरलाईन्स आणि पॉवर ग्रीड ऑपरेटर सतर्क आहेत.

सौर वादळ ऑक्टोबर 2003 च्या हॅलोवीन  स्टॉर्मनंतरचे दुसरे मोठे वादळ आहे. हॅलोविन वादळामुळे स्वीडनमध्ये ब्लॅकआऊट झाले होते. वादळामुळे दक्षिण आफ्रिकेत ग्रीडस् विस्कळीत झाले होते.

आकाशात दिसले अद्भुत दृश्य

सौर वादळे हे सूर्यापासून कोरोनल मास इंजेक्शनमुळे होतात. सूर्याकडून येणारे कण पृथ्वीच्या चुंबकीय क्षेत्रात प्रवेश करतात. कण पृथ्वीवर प्रवेश केल्यानंतर एक प्रतिक्रिया उमटते, ज्यामुळे कण चमकदार रंगीबेरंगी दिवे म्हणून दिसतात. सौर वादळांचा पृथ्वीवरील चुंबकीय क्षेत्रावर परिणाम होतो. यामुळे नासा आपल्या अंतराळवीरांना वादळाच्या वेळी अंतराळ स्थानकाच्या आत राहण्याचा सल्ला देतात.