Jalna Crime : कामावर येण्यास नकार दिल्याने हॉटेल मालकानं महिलेला केलं ठार, चाकूहल्ल्यात मुलासह दोघे जखमी

कामावर येण्यास नकार दिल्याने हॉटेल मालकाने चाकूने भोसकून महिलेचा खून केला. जालन्यामध्ये हा धक्कादायक प्रकार घडला असून सुभद्रा अर्जुन वैद्य (वय – 40) असे मृत महिलेचे, तर गणेश ज्ञानदेव कातकडे (वय – 45) असे आरोपी हॉटेल मालकाचे नाव आहे. त्याने केलेल्या चाकूहल्ल्यात महिलेच्या मुलासह अन्य दोघे जखमी झाले आहेत. पोलिसांनी आरोपीला अटक केली आहे.0

मिळालेल्या माहितीनुसार, सुभद्रा वैद्य या रामनगर साखर कारखाना परिसरातील मथुरा हॉटेवरल गेल्या 8 वर्षांपासून भांडीकुंडी धुण्याचे काम करत होती. मात्र मुलांच्या आग्रहाखातर त्यांनी हॉटेलमध्ये काम करणे बंद केले. मात्र तिने कामावर यावे यासाठी हॉटेल मालक गणेश कातकडे तिच्यावर दबाव टाकत होता आणि दारु पिऊन तिच्या घरी जाऊन धिंगाणाही घालत होता.

शुक्रवारी रात्री साडे बाराच्या सुमारास तो दारु पिऊन सुभद्रा वैद्य यांच्या घरी गेला आणि कामावर येण्यासाठी वाद घालू लागला. मात्र शेजाऱ्यांनी समजूत काढल्यानंतर तो तिथून निघून गेला. त्यानंतर मध्यरात्री 2 वाजता तो पुन्हा सुभद्रा यांच्या घरी आला आणि दरवाजा उघडताच त्याने समोर दिसेल त्याच्यावर चाकूने वार करण्यास सुरुवात केली. पोटात चाकू भोसकल्याने सुभद्रा यांचा जागीच मृत्यू झाला.

दरम्यान, आईच्या आरडाओरड्याने जाग आलेला मुलगा सचिन वैद्य (वय – 20) याच्यावरही आरोपीने हल्ला केला. तसेच मध्यस्थीसाठी धावलेल्या शेजारील अभिषेक याच्यावरही वार केले. या हल्ल्यानंतर पळून जाण्याच्या तयारीत असलेल्या आरोपी गणेश कातकडे याला पोलिसांनी मंठा चोफुली भागातून अटक केली.

परतूरचे उपविभागीय पोलीस अधिकारी सुरेश बुधवंत यांच्यासह मौजपुरी पोलीस ठाण्याचे सहायक पोलीस निरीक्षक मिथुन घुगे, पोलीस उपनिरीक्षक राकेश नेटके यांच्यासह पोलीस कर्मचाऱ्यांनी तातडीने घटनास्थळी भेट दिली. मयत महिलेचा मृतदेह उत्तरीय तपासणीसाठी जिल्हा सरकारी रुग्णालयात हलविण्यात आला आहे. दोन्हीही जखमींवर जिल्हा रुग्णालयात उपचार सुरू आहेत.