मतदानाच्या तिसऱया टप्प्यात छत्रपती संभाजीनगर आणि जालना येथे 13 मे रोजी मतदान होत असून प्रचार शिगेला पोहोचला आहे. या दोन्ही मतदारसंघांत महाविकास आघाडीची तलवार तळपणार असून उद्या शिवसेना पक्षप्रमुख उद्धव ठाकरे यांची दणदणीत जाहीर सभा होणार आहे.

छत्रपती संभाजीनगर मतदारसंघात महाविकास आघाडीचे चंद्रकांत खैरे, गद्दार गटाचे संदिपान भुमरे आणि एमआयएमचे इम्तियाज जलील यांच्यात तिरंगी लढत होत आहे. तर जालना मतदारसंघात भाजपचे रावसाहेब दानवे यांच्यासमोर काँग्रेसचे डॉ. कल्याण काळे यांनी तगडे आव्हान उभे केले आहे. प्रचार आता अंतिम टप्प्यात आला आहे. शिवसेना पक्षप्रमुख उद्धव ठाकरे यांची जालना येथे डॉ. कल्याण काळे यांच्या प्रचारासाठी दुपारी 2 वाजता डॉ. फ्रेजर बॉईज शाळेच्या मैदानावर सभा होणार आहे. त्यानंतर सायंकाळी 6 वाजता छत्रपती संभाजीनगर येथे चंद्रकांत खैरे यांच्या प्रचारासाठी मराठवाडा सांस्कृतिक मंडळाच्या मैदानावर उद्धव ठाकरे यांची जाहीर सभा होणार आहे.

महाविकास आघाडीच्या या सभेला हजारोंच्या संख्येने उपस्थित राहावे, असे आवाहन महाविकास आघाडीच्या सर्व पदाधिकाऱयांनी केले आहे.