रत्नागिरी-सिंधुदुर्गात मतदान प्रक्रिया पार पडल्यामुळे गेले दीड महिना तापलेले राजकीय वातावरण शांत झाले आहे. उमेदवारांचे भवितव्य इव्हीएम मशीनमध्ये बंदीस्त झाले असून आता सर्वांना 4 जूनची प्रतिक्षा आहे. 4 जूनला मतमोजणी होणार आहे. रत्नागिरी-सिंधुदुर्ग लोकसभा मतदार संघातील इंडिया आघाडीचे उमेदवार खासदार विनायक राऊत यांना विजयाचा आत्मविश्वास आहे. ते हॅटट्रिक करण्यासाठी सज्ज झाले आहेत.

रत्नागिरी-सिंधुदुर्ग लोकसभा मतदार संघासाठी काल मंगळवार 7 मे रोजी मतदान झाले. दिवसभरात संपूर्ण मतदार संघात 62.52 टक्के मतदान झाले. मतदार संघातील 1942 मतदान केंद्रावर 14 लाख 51 हजार 630 मतदार होते. त्यापैकी 4 लाख 59 हजार 099 पुरुष, 4 लाख 48 हजार 518 महिला आणि तृतीयपंथी एका मतदाराने मतदान केले. पुरुषांच्या मतदानाची टक्केवारी 50.58 टक्के आहे तर महिलांच्या मतदानाची टक्केवारी 49.42 टक्के आहे. चिपळूण विधानसभा मतदार संघामध्ये 2 लाख 69 हजार 791 मतदारांपैकी 1 लाख 55 हजार 057 मतदारांनी मतदान केले. चिपळ्ण विधानसभा मतदार संघात 57.46 टक्के मतदान झाले. रत्नागिरी विधानसभा मतदार संघामध्ये 2 लाख 83 हजार 552 मतदारांपैकी 1 लाख 72हजार 139 मतदारांनी मतदान केले. रत्नागिरी विधानसभा मतदार संघात 60.71 टक्के मतदान झाले. राजापूर विधानसभा मतदार संघामध्ये 2 लाख 33 हजार 721 मतदारांपैकी 1 लाख 41 हजार 033 मतदारांनी मतदान केले. राजापूर विधानसभा मतदार संघात 60.34 टक्के मतदान झाले.

सिंधुदुर्गात मतदानाचा टक्का वाढला
रत्नागिरी जिल्ह्यातील तीन विधानसभा मतदार संघात सुमारे 60 टक्के मतदान झाले आहे. सिंधुदुर्गात मात्र मतदानाचा टक्का वाढला आहे. कणकवली विधानसभा मतदार संघामध्ये 2 लाख 27 हजार 735 मतदारांपैकी 1 लाख 50 हजार 320 मतदारांनी मतदान केले. कणकवली विधानसभा मतदार संघात 66.01 टक्के मतदान झाले. कुडाळ विधानसभा मतदार संघामध्ये 2 लाख 12 हजार 360 मतदारांपैकी 1 लाख 39 हजार 856 मतदारांनी आपला हक्क बजावला. कुडाळ विधानसभा मतदार संघात 65.86 टक्के मतदान झाले. सावंतवाडी विधानसभा मतदार संघात सर्वाधिक मतदान झाले. सावंतवाडी मतदार संघातील 2 लाख 24 हजार 471 मतदारांपैकी 1 लाख 49 हजार 243 मतदारांनी मतदान केले. सावंतवाडी विधानसभा मतदार संघात 66.49 टक्के मतदान झाले.