उद्धव ठाकरे यांची आज अलिबाग, ऐरोलीत सभा

शिवसेना पक्षप्रमुख उद्धव ठाकरे यांची तोफ उद्या रायगड व नवी मुंबईत धडाडणार आहे. रायगड लोकसभेचे उमेदवार अनंत गीते यांच्या प्रचारासाठी अलिबाग येथील समुद्रकिनाऱयावरील जेएसएम मैदानावर दुपारी 3 वाजता तर ठाणे लोकसभेचे उमेदवार राजन विचारे यांच्या प्रचारासाठी ऐरोलीतील सेक्टर 3 मधील श्रीराम विद्यालय येथे सायंकाळी 5.30 वाजता जाहीर सभा होणार आहे. या दोन्ही सभांची जोरदार तयारी करण्यात आली असून शिवसैनिकांमध्ये उत्साहाचे वातावरण आहे.

रायगड लोकसभा मतदारसंघाची निवडणूक 7 मे रोजी होणार आहे.  या निवडणुकीत महाविकास इंडिया आघाडीचे उमेदवार अनंत गीते यांच्या प्रचाराचा आघाडीच्या कार्यकर्त्यांनी धुरळा उडवून दिला आहे. उद्या होणाऱया सभेत उद्धव ठाकरे विरोधकांवर भीमटोला हाणणार आहेत, तर ठाणे लोकसभेची निवडणूक 20 मे रोजी होणार आहे. या मतदारसंघातील महाविकास आघाडीचे उमेदवार राजन विचारे यांच्या प्रचारासाठी उद्धव ठाकरे यांची सायंकाळी 5.30 वाजता ऐरोलीतील सेक्टर 3 मधील श्रीराम विद्यालयाच्या प्रांगणात दुसरी जाहीर सभा होणार आहे. यावेळी आमदार जितेंद्र आव्हाड, शिवसेना सचिव वरुण सरदेसाई, मुझफ्फर हुसेन, आपचे राज्य उपाध्यक्ष धनंजय शिंदे यांच्यासह शिवसेना आणि महाविकास आघाडीचे पदाधिकारी मोठय़ा संख्येने उपस्थित राहणार आहेत.