T20 World Cup 2024 : निवड झाली नाही, मात्र संजू सॅमसनसाठी खूश आहे ‘हा’ खेळाडू

आगामी टी-20 विश्वचषकासाठी टीम इंडियाचे 15 खेळाडू अमेरिका आणि वेस्ट इंडिजमध्ये मैदान गाजवण्यासाठी सज्ज झाले आहेत. मात्र असेही काही खेळाडू आहेत ते सध्या IPL 2024 मध्ये तुफान फॉर्मात असून त्यांची टी-20 विश्वचषकासाठी निवड झालेली नाही. राजस्थानचा स्टार खेळाडू रियान परागने या सर्व घडोमोडींवर पत्रकारांशी बोलताना चांगली प्रतिक्रिया दिली आहे.

22 वर्षीय रियान परागने राजस्थान रॉयल्स कडून खेळताना आतापर्यंत विस्फोटक फलंदाजी करत सर्वांची मन जिंकलेली आहेत. मागच्या हंगामात त्याचा खेळ सुमार राहिला होता. मात्र या हंगामात टीका करणाऱ्यांची बोलती त्याने बंद केली आहे. त्यामुळे आगामी टी-20 विश्वचषकासाठी टीम इंडियामध्ये त्याची निवड होणार असल्याची चर्चा होती. मात्र त्या चर्चांना आता पूर्ण विराम लागला आहे. या संदर्भात त्याला पत्रकारांनी प्रश्न विचारला असता त्याने गमतीशीर पद्धतीने त्यावर प्रतिक्रिया दिली आहे. “गेल्या वर्षीपर्यंत तर मी आयपीएल खेळण्याच्या शर्यतीत सुद्धा नव्हतो. मात्र मी काही अफवा एकल्या आहेत. मी सोशल मीडियावरही नाही. पण माझ्या नावाची चर्चा झाल्याचे मी एकले, मला आनंद आहे की लोकं माझ नाव योग्य कारणांसाठी घेत आहेत, ” असे म्हणत रियान परागने आपले मत मांडले आहे.

“राजस्थान रॉयल्सच्या ज्या खेळाडूंची टी-20 विश्वचषक 2024 साठी निवड झाली आहे. त्यांच्यासाठी मी खूप खूश आहे. विशेष करून संजू सॅमसनची टीम इंडियात निवड होणे ही खूप खास गोष्ट आहे. मी आशा करतो की आपण टी20 विश्वचषक यावेळी नक्की घरी घेऊन येऊ,” अस म्हणत रियान परागने टीम इंडियाला शुभेच्छा दिल्या आहेत.