‘त्या’ पोलिसाचा मृत्यू चोरट्यांच्या झटापटीत नव्हे; पोलिसांना CCTV फुटेज सापडले

मोबाईल चोरट्याचा पाठलाग करताना चोरट्याने विषारी इंजेक्शन मारल्याने पोलीस शिपायाचा मृत्यू झाल्याबाबत अनेक बातम्या समोर आल्या आहेत. मात्र पोलिसांनी या घटनेचा तपास सुरू केला असता त्यांच्या हाती सीसीटिव्ही फुटेज लागले आहे. त्यानुसार ही घटना मोबाईल चोरी आणि झटापट नसल्याचे पोलिसांना आढळून आले. त्यामुळे पोलिसाचा मृत्यू नेमक्या कोणत्या कारणाने झाला याचा तपास सुरू आहे.

मुंबई पोलीस कॉन्स्टेबल विशाल रमेश पवार या तरुणाचा 27 एप्रिल सव्वाबाराच्या सुमारास मोबाईल चोरीला गेला.  मोबाईल चोराचा पोलिसांनी पाठलाग केला असता चोर आणि पोलीस यांची झटापट झाल्याची माहिती मुंबई रेल्वे पोलीस आयुक्तालयाला 1 मे रोजी सायंकाळी मिळाली. या घटनेबाबत कोपरी पोलीस ठाणे येथे 392, 394,328,34 भादंवि अन्वये गुन्हा दाखल करण्यात आलेला होता. त्यानंतर कोपरी पोलीस ठाणे येथे हा गुन्हा लोहमार्ग आयुक्तालयात वर्ग करण्यापूर्वी तक्रारदार विशाल पवार यांचा मृत्यू झाला होता. या गुन्ह्याची कागदपत्रे जमा झाल्यानंतर दादर रेल्वे पोलिसांनी कलम 302, 392, 394,328,34 भादंवि अन्वये गुन्हा दाखल करून तपास सुरू केला.

चोरटय़ाने विषारी इंजेक्शन मारल्याने पोलिसाचा मृत्यू, सायन-माटुंगादरम्यानची घटना

सदर घटनेची माहिती मिळताच रेल्वे आयुक्तालयात वेगवेगळी पोलीस पथके नेमून तपास सुरू करण्यात आला. मृत्युपूर्वी विशाल पवार यांनी कोपरी पोलीस ठाणे येथे जबाब दिला होता. त्या अनुषंगाने वेगवेगळ्या रेल्वे स्टेशन, फलाट परिसर, रेल्वे ब्रिज, आस्थापना या ठिकाणचे सीसीटिव्ही फूटेज तपासले जात आहे. त्याचा विविध तांत्रिक अंगाने तपास सुरू आहे. तक्रारीत नमूद वेळी व त्यानंतर सुमारे 5 ते 6 तास व त्यानंतरही मृत विशाल पवार हे सीसीटिव्ही फूटेजमध्ये इतरत्र ठिकाणी आढळले. प्रथम दर्शनी फिर्यादीत नमूद वेळी व त्याच्या आसपास माटुंगा-सायन रेल्वे स्टेशन दरम्यान फटका मारुन मोबाईलची जबरी चोरी व त्यांच्यातील झटापटीची घटना घडली नसल्याचे दिसून येत आहे. यामुळे पोलिसाचा मृत्यू नक्की कोणत्या कारणाने झाला याचा तपास सुरू आहे. तपास युद्ध पातळीवर सुरू असून तपासाबाबत संपूर्ण सत्य समोर येणार, असल्याचे पोलिसांनी सांगितले.