भाजप आमदाराची पोलिसाला खुलेआम धमकी, माजी मुख्यमंत्र्यांसमोरच घडला संतापजनक प्रकार

लोकसभा निवडणुकीचा प्रचार जोमात सुरू असताना मध्य प्रदेशमधील विदिशा लोकसभा मतदारसंघात येणाऱ्या भोजपूर विधानसभेचे भाजप आमदार सुरेंद्र पटवा यांनी पोलिसाला धमकी दिल्याचा व्हिडीओ व्हायरल झाला आहे. हा प्रकार घडला तेव्हा मंचावर मध्य प्रदेशचे माजी मुख्यमंत्री शिवराज सिंह चौहान यांचे भाषण सुरू होते.

‘आज तक’ने दिलेल्या वृत्तानुसार, लोकसभा निवडणुकीच्या प्रचारासाठी भाजपकडून सभेचे आयोजन करण्यात आले होते. मात्र नियमांचा हवाला देत पोलीस अधिकारी महेंद्रसिंह ठाकूर यांनी 10 वाजता प्रचार बंद करण्यास सांगितले. याचा राग आल्याने भाजप आमदार सुरेंद्र पटवा यांनी पोलीस अधिकाऱ्याला धमकी दिली.

मंचावरूनच हातवारे करत पटवा यांनी पोलीस अधिकाऱ्याला ‘तुला अशा जागी फेकेन (बदली करेन) की…’, अशा शब्दात धमकी दिली. त्यामुळे सभेच्या ठिकाणी गोंधळाचे वातावरण निर्माण झाले. मंचावरील कार्यकर्त्यांनी भाजप आमदाराला आवरले. हा प्रकार घडला तेव्हा शिवराज सिंह चौहान भाषण करत होते. त्यांनीही आमदार पटवा यांनी शांत करण्याचा प्रयत्न केला.

बीजेपी का अहंकार देखो

चुनाव आचार संहिता का पालन कराने पर बीजेपी के मंच से पूर्व मुख्यमंत्री शिवराज सिंह चौहान ने सवाल किये और सुरेंद्र पटवा ने थाना प्रभारी महेंद्र सिंह ठाकुर को बदतमीज़ी करते हुए धमकाया।

शिवराज जी,
एक पूर्व मुख्यमंत्री का यह स्तर ?

बेहद अशोभनीय और निंदनीय… pic.twitter.com/WTZws1q6mW

— MP Congress (@INCMP) May 3, 2024

दरम्यान, शिवराज सिंह चौहान हे जवळपास 35 वर्षांनी विदिशा लोकसभा मतदारसंघातून निवडणुकीच्या रिंगणात उतरले आहेत. मध्य प्रदेशमधील हा सर्वात हायप्रोफाईल मतदारसंघ आहे. याच मतदारसंघातून माजी परराष्ट्रमंत्री दिवंगत सुषमा स्वराजही निवडणूक लढल्या आणि जिंकल्या होत्या.

विदिशा लोकसभा मतदारसंघामध्ये विधानसभेच्या 8 जागा येतात. यात भोजपूर, विदिशा, इच्छावर, सांची, बासौदा, खाटेगांव, सिलवनी आणि बुधनी मतदारसंघाचा समावेस आहे. भोजपूर विधानसभेमध्ये आयोजित एका सभेला संबोधित करण्यासाठी शिवराज सिंह चौहान पोहोचले होते. त्याचवेळी भाजप आमदार आणि पोलीस अधिकाऱ्यात प्रचार थांबवण्याच्या वेळेवरून बाचाबाची झाली.