‘सामना’च्या बातमीचा दणका… रेती तस्करीचा भांडाफोड

वर्धा जिल्ह्यात रेती तस्करांची दहशत सुरू असून कोट्यवधी रुपयांच्या खनिजावर दरोडा टाकला जात असल्याची बातमी सामनामध्ये प्रसिद्ध होताच हिंगणघाट तालुक्यांत वेगवेगळ्या भागात पोलीसांनी कारवाई करत 7 मोठें टिप्पर, एक ट्रक, रेती काढण्यासाठी वापरली जाणारी यांत्रिकी बोट, पोकलँड मशीन जप्त करत 2 कोटी 33 लाख रुपयांच्या रेतीसह मुद्देमाल जप्त केला आहे.

हिंगणघाट तालुक्यात शेकापूर (बाई), कुटकी शिरसगाव परिसरातील नदीपात्र बोटद्वारे रेती काढून 20 फुटांपर्यंत पोखरून ठेवले आहे. रोज 400 ते 500 टिप्पर रेती खुलेआम वर्धा जिल्ह्यातच नव्हें तर अमरावती व अकोला जिल्ह्यात चोरीच्या पद्धतीने सुरू होती. चक्क पोलीस अधिक्षक व जिल्हाधिकारी यांच्या कार्यालयापुढील व निवासस्थाना समोरून ही सर्व चोरी खुलेआम सुरू होती. सामनामध्ये बातमी येताच पोलीस विभाग जागा होत कारवाईत लागला मात्र खरी महसूल विभागाची जबाबदारी असलेले हिंगणघाट तालुक्यांतील महसूल अधिकारी आजही आपले डोळे मिटून असल्याचे चित्र असल्याची शहरात चर्चा आहे.

हिंगणघाट तालुक्यांत रस्त्यांवर सापळा रचून कारवाई झाली मात्र अद्याप वाळू घाटात जाऊन कारवाई झाली नाही. ही कारवाई वाळू घाटात केली गेली असती तर हा आकडा 50 टीप्परच्या वर गेला असता अशी चर्चा आहे.

एकंदरीत आज झालेल्या कारवाईत दारोडा, शेकापूर, साती, कात्री या घाटाचा उल्लेख आहे. यामुळे या डेपो चालकांचे डेपो रद्द करण्याचा प्रस्ताव नियमाने पाठविणे बंधनकारक असून हे डेपो रद्द करणे महत्त्वाचं असल्याचं बोललं जात आहे.