IPL 2024 : ‘रॉयल’ विजयासह राजस्थानचा प्ले ऑफमध्ये प्रवेश; लखनऊचा 7 विकेट्सने पराभव

लखनऊच्या भारतरत्न श्री अटल बिहारी वाजपेयी मैदानात रंगलेल्या लढतीत राजस्थान रॉयल्स संघाने यजमान संघाचा 7 विकेट्सनी पराभव करत प्ले ऑफमध्ये मोठ्या झोकात प्रवेश केला. लखनऊने विजयासाठी दिलेले 197 धावांचे आव्हान राजस्थानने 6 चेंडू बाकी असताना पूर्ण केले. 9 लढतीत 8 विजयांसह 16 गुण घेऊन प्ले ऑफमध्ये पोहोचणारा राजस्थान पहिला संघ ठरला आहे.

लखनऊने विजयासाठी दिलेल्या आव्हानाचा पाठलाग करण्यासाठी मैदानात उतरलेल्या राजस्थानला यशस्वी जैस्वाल आणि जोस बटलर या जोडीने अर्धशतकीय सलामी दिली. सहाव्या षटकाच्या पाचव्या चेंडूवर बटलर (34) बाद झाला आणि ही जोडी फुटली. पाठोपाठ जैस्वालही (24) बाद झाला. त्यानंतर आलेला रियान परागही (14) आल्या पावली माघारी परतला. त्यामुळे बिनबाद 60 वरून 3 बाद 78 अशी राजस्थानची अवस्था झाली.

तीन गडी बाद झाल्यानंतर कर्णधार संजू सॅमसन आणि ध्रुव जुरेल यांनी डावाची सुत्र हाती घेतली. दोघांनी चौफेर फटकेबाजी केली. संजू सॅमसन याने कर्णधारपदाला साजेशी फटकेबाजी करत 33 चेंडूत नाबाद 71 धावा चोपल्या. यात त्याच्या 7 चौकारांचा आणि 4 षटकारांचा समावेश आहे. तर ध्रुव जुरेल यांनेही आयपीएलमधील पहिले अर्धशतक ठोकले. त्याने 34 चेंडूत 5 चौकार आणि 2 षटकारांच्या मदतीने नाबाद 52 धावा केल्या. दोघांनी राजस्थानला 19 षटकांमध्ये विजय मिळवून दिला.

Highest chase in a LSG-RR game pic.twitter.com/JdPS0vEpo6

— Rajasthan Royals (@rajasthanroyals) April 27, 2024

तत्पूर्वी प्रथम फलंदाजी करणाऱ्या लखनऊची सुरुवात खराब झाली होती. फॉर्मात असणारा क्विंटन डी कॉक 8 आणि स्टॉयनिस शून्यावर बाद झाला. 2 बाद 11 धावा असा संकटात सापडलेला डाव कर्णधार केएल राहुल आणि दिपक हुड्डाने सावरला. दोघांनी शतकीय भागिदारी केली. राहुलने 48 चेंडूत 76, तर हुड्डाने 31 चेंडूत 50 धावा केल्या. त्यानंतर इतर फलंदाजांना वेगाने धावा करता आल्या नाहीत. त्यामुळे लखनऊला 20 षटकात 5 बाद 196 धावांपर्यंत मजल मारता आली.