आकांक्षा, सेन्थिलकुमार उपांत्यपूर्व फेरीत

वृत्तसंस्था/ नवी दिल्ली

भारताच्या अग्रमानांकित वेलावन सेन्थिलकुमारने फ्रान्सच्या मॅटेव कॅरॉगचा सहज पराभव करून येथे पॅरिसमध्ये सुरू असलेल्या 12000 अमेरिकन डॉलर्स बक्षीस रकमेच्या पीएसए चॅलेंजर टूरवरील बॅच ओपन स्क्वॅश स्पर्धेत उपांत्यपूर्व फेरी गाठली. याशिवाय अमेरिकेतील स्प्रिंगफील्ड येथे सुरू असलेल्या एक्स्प्रेशन सेंट जेम्स ओपन स्क्वॅश स्पर्धेत राष्ट्रीय चॅम्पियन आकांक्षा साळुंखेनेही उपांत्यपूर्व फेरी गाठली आहे.

राष्ट्रीय चॅम्पियन सेन्थिलकुमारने फ्रान्सच्या मॅटेव कॅरॉगचा 11-4, 11-6, 11-7 असा केवळ 29 मिनिटांत पराभव केला. पहिल्या फेरीत सेन्थिलकुमारला बाय मिळाला होता. त्याची पुढील लढत पाचव्या मानांकित झेक प्रजासत्ताकच्या याकुब सोलनिकीशी होईल.

अमेरिकेतील स्पर्धेत भारताच्या चौथे मानांकन मिळालेल्या आकांक्षा साळुंखेने पीएसए चॅलेंजर टूरवरील स्पर्धेत ग्वाटेमालाच्या विनिफर बोनिलाचा 11-8, 11-2, 11-9 असा 25 मिनिटांत पराभव करून आगेकूच केली. तिलाही पहिल्या फेरीत बाय मिळाला होता. तिची उपांत्यपूर्व लढत पाचव्या मानांकित युक्रेनच्या अॅलिना बुशमाशी होईल.

Tags: खेळ क्रिडा स्पोर्ट्स

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.