मनोरंजन सृष्टीतील अनेक अभिनेत्री त्यांचं मत बऱ्याच विषयांवर स्प्षटपणे मांडतात. कधी मुलाखतीत तर कधी सोशल मीडियावर पोस्ट लिहून त्या महत्वाच्या विषयांवर मोकळेपणाने व्यक्त होता. आता सध्या ‘मंगळसूत्र’ हा विषय भलताच चर्चेत आहे. राजकारण असो किंवा मनोरंजनसृष्टी, सगळीकडे मंगळसूत्राचीच चर्चा सुरू आहे.
पंतप्रधान नरेंद्र मोदी यांनी नुकत्याच केलेल्या एका वक्तव्यावरून वातावरण चांगलंच तापलं आहे. काँग्रेस सर्वसामान्यांच्या संपत्तीचं सर्वेक्षण करणार आहे, ते सत्ते आले तर तुमचं मंगळसूत्रदेखील हिसकावून घेतील, अशा शब्दात पंतप्रधान नरेंद्र मोदींनी काँग्रेसच्या जाहीरनाम्यावर टीका केली होती. यावरून सोशल मीडियावरही बराच वाद सुरू आहे. तर काही दिवसांपूर्वीच अभिनेत्री क्षिती जोगने लग्नानंतर मंगळसूत्र घालावं की नाही यावरून एका मुलाखतीत भाष्य केलं होतं. एकंदरच ‘मंगळसूत्राच्या’ मुद्यावर बरेच वाद सुरू आहेत.
आता या वादात मराठी अभिनेत्री राधिका देशपांडेनेही उडी घेतली असून ती चांगलीच संतापली आहे. सोशल मीडियावर तिने एक पोस्ट शेअर करत परखडपणे मत मांडलं आहे.
काय म्हणाली राधिका देशपांडे ?
राधिकाने इन्स्टाग्रावर शेअर केलेली पोस्ट जशीच्या तशी…
मी माझ्या मंगळसूत्राचं वजन करू देणार नाही.
मी मंगळसूत्र घालीन किंवा नाही घालणार. माझं लग्नं नुकतंच झालं असो किंवा नसो, माझा नवरा माझा आहे आणि मी त्याची बायको आहे ह्याची आठवण तुम्हाला करून देण्यासाठी मी मंगळसूत्र घालत नसते. त्यामुळे आत्ताच सांगते मी माझ्या मंगळसूत्राचं वजन करू देणार नाही. फरक पडतो. मुळात मंगळसूत्र कशासाठी, कोणासाठी, केंव्हा, कधी, कशाला ह्या प्रश्नाची उत्तरं तुम्हाला का देऊ?
धमकी वजा सूचना समजा
उत्तर द्यायची वेळ नाही पण आज मला प्रश्न नक्कीच पडला आहे. कोण होतात हे स्त्री धनाचा हिशोब, झडती, माहिती घेणारे? हे सगळं घेऊन माझं सोनं वाटून द्यायला तो सत्यनारायणाचा प्रसाद आहे? माझं सोनं हे माझं आहे, ते सौभाग्याचं लेणं आहे. आम्ही स्त्रिया सहज बोलता बोलता त्याला ‘प्रीटी ज्वेलरी‘ असं बोलून जातो. पण बहुतांश भारतीय स्त्रियांकरता सोनं, जे आई-वडिलांनी, सासु-सासऱ्यांनी दिलं आहे, जे तिच्या किंवा नवऱ्याच्या परिश्रमातून विकत घेतलं आहे, अशा सोन्याचं वजन किती बरं असेल? काही गोष्टी आकड्यात मोजता येत नसतात. अर्ध्या हळकुंडात पिवळे झालेल्यांना ते नाही कळायचं. आम्ही स्त्रिया मंगळसूत्राला जीवापाड जपतो. काळजी पोटी ते ठराविक ठिकाणी घालत नाही. माझ्या घरात तर मंगळसूत्र ठेवायची एक स्वतंत्र जागा आहे.
घर घ्यायची वेळ आल्यावर..
घर घ्यायची वेळ आली तेंव्हा मी माझं सोन विकलं पण मंगळसूत्र मुठीतून सुटलं नाही. आणि ह्या धनाचा हिशोब आणि वाटप आम्ही होऊ द्यायचा, ह्या डाव्या नेत्यांच्या आणि त्यांच्या पार्टीच्या धोरणांच्या पूर्णत्वा करता! मागे टिकली/बिंदी वरून चर्चा उधळली, इतक्यात मंगळसूत्र चर्चेचा विषय ठरलं तर उद्या लग्न संस्कृती वर काहीतरी घणाघाती बोलतील. तर “मी माझ्या मंगळसूत्राचं वजन करू देणार नाही!” विषय संपला.
या पोस्टसोबत राधिकाने तिच्या लग्नातला एक फोटो शेअर केलाय, पण त्यामध्ये तिच्या गळ्यात मंगळसूत्र दिसत नाहीये. त्याबद्दलही तिने स्पष्टीकरण दिलंय –
हा फोटो २००५ सालचा आहे, माझ्या लग्नातला. विधी सुरू होण्या आगोदरचा असल्यामुळे ह्यात मंगळसूत्र नाही पण तेंव्हा पासून हा दागिना सौभाग्याचं लेणं ठरला. फोटो जुना आहे पण जुनं ते सोनंच नाही का? म्हणूनच टिकवून ठेवायचं
सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.
.jpeg)
Comment List