मुंबई-पुणे एक्प्रेस वेवरील प्रवासाचा वेग वाढणार

मुंबई-पुणे द्रुतगती महामार्गावरील बोरघाटात ताशी 50 किमी वेगमर्यादेत वाढ करून ताशी 60 अशी वेगमर्यादा निश्चित करण्यात आली आहे. नवीन वेगमर्यादेची अंमलबजावणी दोन दिवसांपासून सुरू झाली असून यामुळे महामार्गावरील प्रवासाचा वेग वाढणार आहे.

मुंबई ते पुणे द्रुतगती महामार्ग 94 किमीचा असून या महामार्गावर प्रवास करताना हलक्या वाहनांना समतल भागात ताशी 100 किमी अशी वेगमर्यादा होती, तर 35 ते 52 किमीच्या बोरघाटात ताशी 50 किमी अशी वेगमर्यादा होती. अशावेळी समतल भागातून ताशी 100 किमी वेगाने येणाऱया वाहनांना बोरघाटात येताना ताशी 50 किमी वेग करणे अडचणींचे ठरत होते. त्यामुळे अपघातही होत होते. ही बाब लक्षात घेता पोलीस अधीक्षक, महामार्ग सुरक्षा पथक, रायगड परिक्षेत्र यांनी एक प्रस्ताव सादर केला होता. त्यानुसार बोरघाटातील वेगमर्यादा बदलण्याची आवश्यकता व्यक्त केली होती. या प्रस्तावाच्या अनुषंगाने 15 एप्रिल रोजी महाराष्ट्र राज्य रस्ते विकास महामंडळ (एमएसआरडीसी), परिवहन विभाग, पोलीस अधीक्षक, महामार्ग सुरक्षा पथक, रायगड परिक्षेत्र आणि इतर प्राधिकरणाच्या अधिकाऱयांची एक बैठक झाली. या बैठकीत एकमताने बोरघाटातील वेगमर्यादा बदलण्याचा निर्णय घेण्यात आला. त्यानुसार आता महामार्गावर हलक्या वाहनांना समतल भागात ताशी 100 किमी तर बोरघाटात ताशी 60 किमी अशी वेगमर्यादा लागू करण्यात आली आहे. मागील दोन दिवसांपासून ही नवीन वेगमर्यादा लागू करण्यात आली आहे.