निक जोनाससोबत ‘या’ 166 कोटींच्या बंगल्यात राहायला जाणार प्रियांका चोप्रा

अभिनेत्री प्रियांका चोप्रा आणि तिचा पती निक जोनास हे लवकरच त्यांच्या लॉस एंजिलिसमधल्या नूतनीकरण केलेल्या घरात राहायला जाणार आहेत. त्यांच्या या भव्यदिव्य घराची किंमत तब्बल 20 दशलक्ष डॉलर्स म्हणजेच 166 कोटी रुपयांहून अधिक आहे.

2018 मध्ये लग्न केल्यानंतर प्रियांका निकसोबत लॉस एंजिलिसमध्ये स्थायिक झाली. 'द हॉलिवूड हिल्स मॅन्शन'मध्ये हे दोघं त्यांची मुलगी मालती मेरीसोबत राहतात. या घराचं बांधकाम पुन्हा नव्याने करण्यात आलं असून त्याचे काही फोटो समोर आले आहेत.

प्रियांका-निकचं हे घर राहण्यालायक राहिलेलं नव्हतं, म्हणून ते काही महिन्यांपूर्वी दुसरीकडे राहायला गेले होते. घरात ठिकठिकाणी पाण्याची गळती होत असल्याने बुरशीचा प्रादुर्भाव झाला होता. इतकंच नव्हे तर त्यांनी घराच्या विक्रेत्याविरोधात कायदेशीर तक्रारसुद्धा केली होती.

लॉस एंजिलिसमध्ये प्रियांका आणि निकचं अत्यंत आलिशान घर आहे. सात बेडरुम्स, नऊ बाथरुम्स, तापमान नियंत्रित ठेवणारं वाइन सेलर, शेफचं किचन, होम थिएटर, बोलिंग ॲली, स्पा आणि स्टीम शॉवर, जिम आणि बिलियर्ड्स रुम.. अशा सर्व सुविधा या आलिशान घरात आहेत.

2019 मध्ये प्रियांका-निकने हे घर तब्बल 20 दशलक्ष डॉलर्सना विकत घेतलं होतं. प्रियांका-निकने मे 2023 मध्ये या घराच्या विक्रेत्याविरोधात खटला दाखल केला होता. कारण घर खरेदी केल्यापासूनच स्विमिंग पूल आणि स्पा भागात विविध समस्या निर्माण होऊ लागल्या होत्या, असा आरोप त्यांनी केला आहे.