पाक-न्यूझीलंड सामना पावसामुळे रद्द

वृत्तसंस्था/ रावळपिंडी

न्यूझीलंडचा क्रिकेट संघ सध्या पाकच्या दौऱ्यावर पाच सामन्यांची टी-20 मालिका खेळण्यासाठी दाखल झाला आहे. दरम्यान या मालिकेतील पहिला सामना गुरुवारी आयोजित केला होता पण मुसळधार पावसामुळे हा सामना पूर्णपणे वाया गेला.

या सामन्याला प्रारंभ होण्यापूर्वी पावसाने अडथळा आणला होता. त्यामुळे पंचांनी खेळ सुरू केला नाही. काही वेळ पाऊस थांबल्यानंतर पंचांनी हा सामना प्रत्येकी पाच षटकांचा खेळवण्याचा निर्णय घेतला होता. नाणेफेक केल्यानंतर पाकने न्यूझीलंडला प्रथम फलंदाजी दिली. पाकचा वेगवाग गोलंदाज शाहीन आफ्रिदीने न्यूझीलंडचा सलामीचा फलंदाज टीम रॉबिनसनला खाते उघडण्यापूर्वीच त्रिफळाचित केले. केवळ दोन चेंडू टाकल्यानंतर पुन्हा पावसाचे आगमन झाल्याने हा सामना पंचांनी रद्द केल्याचे जाहीर केले. न्यूझीलंडची स्थिती 1 बाद 2 अशी होती. आता उभय संघातील दुसरा टी-20 सामना शनिवारी खेळवला जाणार आहे.

न्यूझीलंडविरुद्ध सुरू असलेल्या पाच सामन्यांच्या टी-20 मालिकेसाठी पीसीबीने अष्टपैलू इमाद वासीम आणि आमीर यांना पुन्हा संघात स्थान दिले आहे. आमीर आणि अष्टपैलू वासीम यांनी यापूर्वी क्रिकेटमधून निवृत्ती पत्करली होती. आता ते येत्या जून महिन्यात विंडीज आणि अमेरिका येथे होणाऱ्या आयसीसीच्या टी-20 विश्वचषक क्रिकेट स्पर्धेसाठी उपलब्ध राहणार असल्याचे पीसीबीला कळविले आहे. या मालिकेतील दुसरा आणि तिसरा सामना रावळपिंडीत खेळवला जाणार असून शेवटचे दोन सामने 25 आणि 27 एप्रिलला लाहोरमध्ये होतील.