मुंबईतील नाले होणार बंदिस्त; कचरा फेकण्यावर निर्बंध आणण्यासाठी उपाय

मुंबईतील महत्त्वाचे नाले आता मजबूत प्लॅस्टिक आवरण, लोखंडी जाळय़ांनी बंदिस्त करण्यात येणार आहेत. नाल्यात टाकण्यात येणारा कचरा रोखण्यासाठी हा निर्णय घेण्यात आला आहे. या उपक्रमात वांद्रे पूर्वसह इतर काही ठिकाणी करण्यात आलेला प्रयोग यशस्वी करण्यात आल्यामुळे मुंबईभरात हा प्रयोग केला जाणार असल्याची माहिती पालिका प्रशासनाकडून देण्यात आली.

मुंबईला स्वच्छ-सुंदर बनवण्यासाठी पालिकेच्या माध्यमातून अनेक प्रयत्न करण्यात येत आहेत. यामध्ये पावसाळय़ात नागरिकांना गैरसोयींचा सामना करावा लागू नये यासाठी व्यापक प्रमाणात नालेसफाई करण्यात येते, मात्र मार्चपासून नालेसफाई झाल्यामुळे पावसाळय़ापूर्वी मोठय़ा प्रमाणात या नाल्यांमध्ये गाळ साचतो. यामध्ये रहिवाशांकडून नाल्यात टाकण्यात येणाऱया कचऱयाचे प्रमाण जास्त असल्यामुळे नालेसफाई झाल्यानंतरही नाले तुंबण्याचे प्रकार घडतात. याला आळा घालण्यासाठी नाल्यात कचरा टाकताना आढळल्यास एक हजार रुपयांपर्यंत दंड करण्याचा निर्णयही घेण्यात आला आहे. तर आता हे नाले बंदिस्त करून नाल्यात टाकण्यात येणाऱया कचऱयाला आळा घालण्यात येणार आहे.

वांद्रय़ातील प्रयोग यशस्वी

वांद्रे येथील पी अॅण्ड टी कॉलनी नाल्याशेजारी 10 फूट उंच जाळय़ा बसविण्यात आल्या होत्या. या ठिकाणी जाळय़ा बसविण्याचा प्रयोग यशस्वी झाला असून अन्य ठिकाणी नाल्याशेजारी जाळय़ा बसवण्यात येतील. तसेच नाल्याशेजारी कचरा फेकणाऱयांवर सीसीटीव्हीच्या माध्यमातून नजर ठेवण्यात येणार असून घनकचरा व्यवस्थापन विभागाच्या माध्यमातून दंडात्मक कारवाईचा निर्णयही घेण्यात आला आहे.

मुंबईतील नाले

छोटे नाले          1508 (लांबी 605 किमी)

मोठे नाले          309 (लांबी 290 किमी)