शाहू महाराजांना पाठिंब्यासाठी 17 माजी महापौर, 228 माजी नगरसेवक मैदानात!

महाविकास आघाडीचे काँग्रेसचे कोल्हापूर लोकसभेचे उमेदवार श्रीमंत शाहू महाराज छत्रपती यांना शहरातील तब्बल 17 माजी महापौर आणि 228 माजी नगरसेवकांनी पाठिंबा देत निवडून आणण्याचा निर्धार व्यक्त केला. देशातील हुकूमशाही कारभाराविरुद्ध कोल्हापुरातून लढाई सुरू करण्याचा एल्गारही करण्यात आला.

न्यू पॅलेस येथे काँग्रेसचे उमेदवार श्रीमंत शाहू छत्रपती, काँग्रेसचे जिल्हाध्यक्ष, आमदार सतेज पाटील, आमदार पी. एन. पाटील, आमदार ऋतुराज पाटील, आमदार जयंत आसगांवकर, आमदार जयश्री जाधव, राष्ट्रवादीचे जिल्हाध्यक्ष व्ही. बी. पाटील, माजी आमदार मालोजीराजे छत्रपती, काँग्रेसचे प्रदेश निरीक्षक रामचंद्र दळवी यांच्या प्रमुख उपस्थितीत आज माजी नगरसेवकांची बैठक झाली.

यावेळी माजी महापौर महादेव आडगुळे, रामभाऊ फाळके, आर. के. पोवार, कांचन कवाळे, भीमराव पोवार, मारुतराव कातवरे, सई खराडे, सागर चव्हाण, वंदना बुचडे, जयश्री सोनवणे, प्रतिभा नाईकनवरे, वैशाली डकरे, अश्विनी रामाणे, स्वाती यवलुजे, ऍड. सुरमंजिरी लाटकर, शोभा बोंद्रे, निलोफर आजरेकर यांच्यासह 228 माजी नगरसेवक उपस्थित होते. नुकतीच महायुतीने पत्रकार परिषद घेऊन संजय मंडलिक यांच्यासाठी शंभर माजी नगरसेवक पाठिंबा देत असल्याचे जाहीर केले होते. त्याच्यावर श्रीमंत शाहू महाराज यांच्यासाठी काँग्रेसकडून डबल धमाका करण्यात आला.