अंजू, हर्षिता यांना रौप्यपदके

वृत्तसंस्था/ बिशेक (किर्गिजस्तान)

येथे झालेल्या वरिष्ठांच्या आशियाई महिलांच्या कुस्ती चॅम्पियनशिप स्पर्धेत रेल्वेच्या अंजूने तसेच हर्षिताने आपल्या वजन गटातून रौप्यपदके पटकाविली. मात्र सरिता मोरला या स्पर्धेतून विनापदक परतावे लागले आहे.

या स्पर्धेत भारताचे प्रतिनिधीत्व करणाऱ्या अंजूने महिलांच्या 53 किलो वजन गटात फिलिपिन्सच्या अलिया गॅव्हेलेज तसेच लंकेच्या निथमी फर्नांडोचा तांत्रिक गुणावर पराभव करत उपांत्य फेरी गाठली. मात्र उपांत्य फेरीत तिला चीनच्या लेईकडून कडवा प्रतिकार मिळाला पण अंजूने ही लढत 9-6 अशा गुणांनी जिंकत अंतिम फेरीत प्रवेश मिळविला. अंतिम फेरीतील लढतीत कोरियाच्या जी हेयांग किमने अंजूचा एकतर्फी पराभव करत सुवर्णपदक पटकाविले. महिलांच्या 72 किलो वजन गटात भारताच्या हर्षिताला अंतिम लढतीत चीनच्या जियांगने 2-5 अशा गुणांनी पराभूत करत सुवर्णपदक मिळविले. हर्षिताला रौप्यपदकावर समाधान मानावे लागले. भारताच्या सरिता मोरला मात्र उपांत्यपूर्व फेरीच्या लढतीत मंगोलियाच्या इनेकबेथकडून हार पत्करावी लागल्याने तिला विनापदक मायदेशी परतावे लागत आहे. या स्पर्धेतमध्ये भारताच्या मनिषा बनवालने 62 किलो गटात, अंतिम कुंडूने 65 किलो गटात कांस्यपदके मिळविली. या संपूर्ण स्पर्धेत भारताने एकूण 6 पदकांची कमाई केली असून त्यामध्ये 3 रौप्य आणि 3 कांस्पपदकांचा समावेश आहे. शनिवारी समाप्त झालेल्या पुरूषांच्या विभागात भारताच्या उदितने रौप्यपदक तर अभिमन्यू, विकी यांनी कांस्यपदके मिळविली. ग्रीको रोमन पद्धतीच्या लढतींना सोमवारपासून प्रारंभ झाला आहे.