अमेरिकेनंतर कॅनडा; हिंदुस्थानी विद्यार्थ्यांचे मृत्युसत्र थांबेना, 24 वर्षीय चिरागचा मृतदेह कारमध्ये सापडला

विदेशामध्ये उच्चशिक्षण घेण्यासाठी गेलेल्या हिंदुस्थानी विद्यार्थ्यांचे सत्र थांबण्याचे नाव नाही. अमेरिका, ऑस्ट्रेलियानंतर आता कॅनडामध्येही हिंदुस्थानी विद्यार्थ्याची हत्या झाल्याचे प्रकरण समोर आले आहे. हरियाणातून कॅनडामध्ये शिकायला गेलेल्या चिराग अंतिल या 24 वर्षीय विद्यार्थ्याचा मृतदेह कारमध्ये आढळला आहे. 12 एप्रिल रोजी ही घटना घडल्याची माहिती मिळतेय.

कॅनडा पोलिसांनी दिलेल्या माहितीनुसार, चिराग अंतिल याचा मृतदेह ऑडी कारमध्ये सापडला आहे. त्याच्या घराशेजारी राहणाऱ्यांना गोळीबाराचाही आवाज आला होता. याप्रकरणी गुन्हा दाखल करण्यात आला असून चिरागची हत्या झाली की त्याने आत्महत्या केली याचा तपास सुरू आहे.

चिराग अंतिल हा हरियाणातील सोनीपत येथील रहिवासी होता. 2002 मध्ये एमबीएचे शिक्षण घेण्यासाठी तो कॅनडातील ब्रिटीश कोलंबिया भागात असणाऱ्या व्हँकुव्हर येथे गेला होता. शिक्षणासोबत तो कामही करत होता. मात्र त्याचा मृत्यू झाल्याचे समोर आल्याने कुटुंबियांना धक्का बसला आहे.

दरम्यान, चिरागच्या कुटुंबियांनी त्याचा मृतदेह मायदेशी आणण्यासाठी पंतप्रधान नरेंद्र मोदी आणि परराष्ट्र मंत्री एस. जयशंकर यांना साकडे घातले आहे. ही घटना घडली त्याच दिवशी सकाळी चिराग आणि त्याचा भाऊ रोहित यांचा फोनवर संवादही झाला होता. मात्र त्यानंतर त्याच्या मृत्युचीच बातमी आली. आम्ही कॅनडाच्या पोलिसांशीही चर्चा केली, मात्र ही घटना कशी घडली याची माहिती त्यांनी दिलेली नाही, असे चिरागचा भाऊ रोहित म्हणाला.